Ўзбекистон технологик металлар комбинати Европанинг йирик банки билан 50 миллион евролик келишув имзолади
Ўзбекистон технологик металлар комбинати (ТМК) Буюк Британияда ўтказилган “Инвесторлар куни” халқаро анжумани доирасида Европанинг энг йирик молиявий институтларидан бири — “Société Générale” банки билан 50 миллион евро миқдоридаги молиявий ресурсларни жалб қилиш бўйича асосий шартлар келишуви (Terms Sheet)ни имзолади. Мазкур келишув ТМКнинг халқаро капитал бозорларидаги иштирокини янги босқичга олиб чиқиш билан бирга, Ўзбекистоннинг критик минераллар ва технологик металлар саноатини глобал молия тизими билан интеграция қилиш йўлидаги муҳим қадами сифатида баҳоланмоқда.
Ҳамкорлик доирасида узоқ муддатли кредит линияларини ташкил этиш, савдо операцияларини молиялаштириш ҳамда экспортга йўналтирилган, чуқур қайта ишлашга асосланган саноат лойиҳаларини қўллаб-қувватлаш кўзда тутилган. Шунингдек, томонлар замонавий инвестицион-банк механизмларини жорий этиш, халқаро экспорт-кредит агентликлари (ECA) билан ҳамкорликни кенгайтириш ва ESG тамойиллари асосида “яшил” ҳамда барқарор ишлаб чиқариш лойиҳаларини ривожлантириш бўйича якдил фикрга келдилар. Бу ТМКнинг глобал молия бозорларидаги инвестициявий жозибадорлигини янада оширишга хизмат қилади.
“Инвесторлар куни” тадбирлари доирасида комбинати делегацияси дунёнинг етакчи молиявий ва инвестициявий институтлари, хусусан, “J.P. Morgan”, “BlackRock”, “Wellington Management Company LLP”, “Ashmore Investment Management”, “T. Rowe Price Associates” ва “AXA Investment Management” компаниялари раҳбарияти билан ҳам самарали музокаралар ўтказди. Мулоқотлар давомида халқаро инвесторлар ТМК томонидан халқаро капитал бозорида евробондларнинг муваффақиятли жойлаштирилгани, компаниянинг критик минераллар бозоридаги истиқболлари ва юқори қўшимча қийматга эга саноат лойиҳаларига юқори баҳо бердилар.
Бундан ташқари, ТМК халқаро инвестициялар ва стратегик саноат лойиҳаларини молиялаштиришга ихтисослашган “Kirkoswald Capital Partnership LLP” компанияси билан англашув меморандумини имзолади. Ушбу ҳужжат муҳим хомашё ва технологик металлар соҳасида узоқ муддатли ҳамкорликни ривожлантириш, халқаро етказиб бериш занжирларини шакллантириш ҳамда қўшма инвестиция лойиҳаларини амалга оширишни назарда тутади.
Бугунги кунда Ўзбекистон технологик металлар комбинати “кон-металл-бозор” тамойили асосида геология-қидирув, қазиб олиш, қайта ишлаш ва тайёр маҳсулот ишлаб чиқаришни ўз ичига олган ягона саноат экотизимини изчил шакллантирмоқда. Компания критик минераллар ва технологик металлар йўналишида халқаро ҳамкорлик кўламини кенгайтириш орқали Ўзбекистонни глобал саноат ва яшил иқтисодиёт учун муҳим хомашё марказларидан бирига айлантиришни мақсад қилган.
ЎзА
