O‘zbekiston terma jamoasi futbolchisi BAA klubidan ketdi

G‘aniyev yangi mavsumni boshqa jamoa safida boshlashi kutilmoqda.

Aziz G‘aniyevning BAA chempionatidagi “Al-Bataeh” bilan faoliyati yakuniga yetdi. Klub 28 yoshli o‘zbekistonlik yarim himoyachi bilan hamkorlik to‘xtatilganini rasman ma’lum qildi.

G‘aniyev “Al-Bataeh”ga 2024-yil yozida kelib qo‘shilgandi. Transfermarkt ma’lumotlariga ko‘ra, tomonlar o‘rtasidagi shartnoma aslida 2027-yil 30-iyungacha amal qilishi kerak edi. Biroq futbolchi va klub bitim muddati tugashini kutmasdan yo‘llarini ajratdi.

Hozircha O‘zbekiston milliy jamoasi futbolchisining faoliyatini qaysi klubda davom ettirishi ma’lum emas. Shu sabab G‘aniyev yangi mavsumni boshqa jamoa safida boshlashi kutilmoqda.

Markaziy yarim himoyada harakat qiladigan futbolchi zaruratga qarab tayanch yoki hujumkor yarim himoyachi vazifasini ham bajara oladi. Transfermarkt uning ayni paytdagi bozor qiymatini 2 million yevroga baholamoqda.

Jizzaxda tug‘ilgan G‘aniyev klub miqyosidagi faoliyati bilan bir qatorda O‘zbekiston milliy jamoasi safida ham to‘p surib kelmoqda.