Ўзбекистон меҳнат соҳасида сунъий интеллектни инсон манфаатларига йўналтиришни қўллаб-қувватлади (+видео)

Женева шаҳрида бўлиб ўтаётган Халқаро меҳнат конференциясининг 114-сессияси доирасида Ўзбекистон сунъий интеллект технологияларини меҳнат соҳасига жорий этишда инсон манфаатлари устувор бўлиши кераклиги позициясини билдирди.

Тадбирда Ўзбекистон Республикаси камбағалликни қисқартириш ва бандлик вазири Ботир Зоҳидов сунъий интеллект янги иш ўринлари яратиш, ходимларнинг кўникмаларини ривожлантириш ҳамда меҳнат бозорида самарадорликни оширишга хизмат қилиши лозимлигини таъкидлади.

Шунингдек, Ўзбекистон томони рақамли трансформация жараёнлари адолатли тарзда амалга оширилиши, у мунтазам равишда мунозара ва ижтимоий шерикликка асосланиши кераклигини қайд этди. Мамлакат муносиб меҳнат, ижтимоий ҳимоя ва самарали ижтимоий мулоқот тамойилларига таянган ҳолда рақамлаштириш жараёнларини қўллаб-қувватлашини билдирди.

Маълумот ўрнида, конференцияда 187 та давлат вакиллари иштирок этмоқда. Ўзбекистон делегацияси эса меҳнат, ижтимоий ҳимоя ва рақамли иқтисодиёт соҳаларида амалга оширилаётган ислоҳотлар, шунингдек, илғор ташаббусларни халқаро ҳамжамиятга тақдим этмоқда.

<iframe width="640" height="420" src="https://www.youtube.com/embed/FnjcSimIzxY" title="O‘zbekiston mehnat sohasida sunʼiy intellektni inson manfaatlariga yo‘naltirishni qo‘llab-quvvatladi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Муҳайё Тошқораева, ЎзА