Ўзбек жанг санъати: мамлакат кубоги мусобақасида 500 нафар ёшлар қатнашмоқда
Ўзбекистон давлат жисмоний тарбия ва спорт университети мажмуасида ўзбек жанг санъати бўйича ўтказилаётган Ўзбекистон кубоги мусобақаси 500 нафарга яқин ёшларни бир майдонда жамлади.
Мамлакатимизнинг 12 та ҳудудидан 7 ёшдан 13 ёшгача бўлган ўғил-қизлар иштирок этаётган Ўзбекистон кубоги баҳслари баркамол авлод вакиллари, уларнинг ота-оналари учун чинакам спорт байрами кўринишини олди.
Ўзбекистон кубогининг тантанали очилиш маросимида ўзбек жанг санъати спорт турининг ривожига муносиб ҳисса қўшиб келаётган, ёш авлодни спортга жалб этишда фидокорлик кўрсатаётган бир гуруҳ соҳа фахрийларига “Ўзбек жанг санъати спорт турига қўшган хизматлари учун” кўкрак нишони топширилди.
Ёш спортчиларнинг иқтидорини намоён этиш, улар ўртасида соғлом рақобат муҳитини шакллантириш ҳамда ўзбек жанг санъати спорт турини янада оммалаштиришга қаратилган Ўзбекистон кубоги мусобақалари давом этмоқда.
Т. Рўзиев, ЎзА
