“Ўзагроинспекция” коррупцияга қарши қандай курашмоқда?
Коррупцияга қарши курашиш бугун давлат бошқарувидаги энг муҳим вазифалардан бирига айланган. Бу борада “Ўзагроинспекция” тизимида ҳам шаффофликни таъминлаш, инсон омилини камайтириш ва хавфларни барвақт аниқлашга қаратилган кенг қамровли ишлар амалга оширилмоқда.
Қайд этилишича, ҳозирда Инспекцияда коррупцияга қарши курашишни тартибга солувчи 12 та ички ҳужжат амалиётга жорий этилган. Шунингдек, “Манфаатлар тўқнашуви тўғрисида”ги қонун ижросини таъминлаш мақсадида махсус дастур қабул қилиниб, 1080 нафар ходим томонидан декларациялар тўлдирилди.
Фуқароларнинг мурожаатлари билан ишлашда ҳам янги механизмлар ишга туширилди. Бугунги кунда коррупция ёки манфаатлар тўқнашувига оид ҳолатлар ҳақида хабар бериш учун мўлжалланган 4 та алоқа канали кеча-кундуз ишламоқда.
Коррупциянинг олдини олиш фақат назорат билан эмас, балки профилактика билан ҳам боғлиқ. Шу мақсадда ходимлар ўртасида 1400 дан ортиқ буклет ва инфографик материаллар тарқатилди, ўқув-тренинглар ва профилактик тадбирлар ташкил этилди.
Кадрлар билан ишлашда ҳам шаффофлик устувор вазифага айланган. Янги ишга қабул қилинаётган номзодлар коррупциявий хавфлар нуқтаи назаридан баҳоланмоқда. Ҳисобот даврида 150 нафар номзод ўрганиб чиқилди. Шу билан бирга, хавф юқори бўлган йўналишларда фаолият юритаётган ходимлар махсус малака ошириш курсларига жалб қилинди.
Рақамлаштириш соҳасида амалга оширилган ишлар эса инсон омилини қисқартириш ва хизматлар кўрсатишдаги шаффофликни янада кучайтиришга хизмат қилмоқда. Инспекция ахборот тизимлари 16 та вазирлик ва идора билан интеграция қилинган бўлиб, аҳолига 11 турдаги давлат хизмати электрон шаклда тақдим этилмоқда.
Коррупцияга қарши курашишда жазодан кўра тизимли профилактика ва рақамлаштириш муҳим аҳамият касб этади. “Ўзагроинспекция”да амалга оширилаётган чора-тадбирлар айнан шу тамойилга асосланиб, соҳада очиқлик ва жамоатчилик ишончини мустаҳкамлашга хизмат қилмоқда.
Муҳайё Тошқораева,
ЎзА
