Отахон ҳуқуқий ҳужжатга эга бўлди
Адлия идораларининг ташаббуси билан Наманган вилоятининг Тўрақўрғон туманида инсон қадрини улуғлаш ва ҳуқуқларини таъминлашга қаратилган яна бир муҳим масала ижобий ҳал этилди.
Маълум бўлишича, 1937 йилда туғилган Алихон Зариповнинг туғилганлик далолатнома ёзуви мавжуд эмаслиги сабабли у узоқ йиллар давомида тегишли ҳужжатсиз яшаб келган. Ушбу ҳолат кекса кишига бир қатор ижтимоий ва ҳуқуқий хизматлардан тўлақонли фойдаланишда қийинчиликларни юзага келтирган.
Муаммо туман адлия бўлими тарафидан тегишли тартибда ўрганилиб, фуқаролик ишлари бўйича Чуст туманлараро судига мурожаат қилинди. Суд томонидан иш атрофлича кўриб чиқилиб, фуқаронинг туғилганлик ҳолатини тасдиқловчи далиллар асосида туғилганлик қайта тиклаш тўғрисида қарор қабул қилинди.
Мазкур қарорга асосан туман ФҲДЁ бўлими Алихон отага туғилганлик ҳақида гувоҳномани расмийлаштириб берди. Бундай амалий ёрдам натижасида нуронийнинг ҳуқуқий мақоми тикланиб, эндиликда у давлат хизматларидан тўлақонли фойдаланиш имкониятига эга бўлди.
Оқилхон Дадабоев, ЎзА.
