
Олий суд ахборот хизматидан маълум қилишларича, ўтган йилда фуқаролик ишлари бўйича судлар томонидан никоҳдан ажратишга оид 4 минг 392 иш бўйича тарафлар яраштирилганлиги муносабати билан шунча оила сақлаб қолинишига эришилган.
Вояга етмаган болалар учун алимент ундириш юзасидан 80 мингга яқин иш бўйича талаблар қаноатлантирилиб, алимент пулларини ундириш ҳақида суд қарорлари қабул қилинган.
2024 йилда судлар томонидан низо ҳал этилишининг муқобил усулларини қўллашга алоҳида эътибор қаратилаётгани ҳамда тарафларга медиация институти тартиб-таомиллари батафсил тушунтириб берилаётгани туфайли 3 минг 238 иқтисодий ва 3 мингдан зиёд фуқаролик низо тарафлар ўртасида медиатив келишувлар тузилгани сабабли тамомланган.
Маъмурий судлар томонидан ўтган йилда биринчи инстанцияда адвокатлик лицензиясининг амал қилишини тўхтатиб туриш ҳамда тугатишга оид 95 иш кўриб чиқилган. Натижада 50 та адвокатлик лицензиясини тўхтатиб туриш ва 13 та адвокатлик лицензиясини тугатиш ҳақида қарорлар чиқарилган.
Н.Абдураимова, ЎзА