Табиий ресурслар захирасининг муттасил равишда қисқариши, глобал экологик муаммоларнинг кескинлашуви шароитида экспертлар вазиятни ўнглаш учун жаҳон иқтисодиётида “яшил тараққиёт” тамойилларини жорий этиш зарурлигини таъкидламоқда. Мазкур ёндашув БМТ Барқарор тараққиёт мақсадларида ҳам ўз ифодасини топган. 2019 йилда мамлакатимизнинг “Яшил иқтисодиёт”га ўтиш стратегияси” қабул қилинди. Яқин ўн йилда мамлакатда углерод сарфини кескин камайтириш, иқтисодиётнинг барча тармоқларида экологик тоза ва ресурс тежамкор технологияларни жорий этиш, қайта тикланувчи, самарали энергия манбаларидан кенг фойдаланиш кўзда тутилган. Олмалиқ кон-металлургия комбинатида ҳам бу борада самарали ишлар амалга ошириб келинмоқда.

Хусусан, шу кунга қадар “Олмалиқ КМК” АЖнинг 98 та ишлаб чиқариш ва ижтимоий соҳа объектларида умумий қуввати 9 041 кВт бўлган қуёш фотоэлектр станциялари ўрнатилди. Рақамларга эътибор қаратадиган бўлсак комбинатнинг 85 та объектларида 8 649 кВт, ОКМКнинг ҳомийлигидаги 13 та объектларда 392 кВт бўлган қуёш фотоэлектр станциялари ўрнатилди.

Жорий йилнинг 11 ойи давомида ўрнатилиб, ишга туширилган қуёш фотоэлектр станциялар томонидан 3 млн кВт.соатдан кўпроқ электр энергияси ишлаб чиқарилганини алоҳида таъкидлаш жоиз. Ишлаб чиқарилган электр энергияси саноат ва ижтимоий соҳа объектлари эҳтиёжлари учун истеъмол қилинди.  

Яна рақамларга эътибор қаратадиган бўлсак, йилдан-йилга ОКМКда қуёш фотоэлектр станциялари томонидан электр энергиясининг ишлаб чиқариш ҳажми ошиб бормоқда. 2023 йилда фотоэлектр станцияларда 638 минг кВт.соатдан кўпроқ электр энергияси ишлаб чиқарилган. 2024 йилнинг 11 ойида эса 3 млн кВт.соатдан ошиқ электр энергияси қуёш панелларидан олинган.

Яна бир эътиборга молик жиҳат, комбинатнинг Саноат темир йўл транспорт бошқармасининг 3-сонли темир йўл цехи ҳудудидан оқиб ўтувчи «Таначи-Бўка» каналига қуввати 30 кВт.соатни ташкил қилувчи гидротурбинали генератор ўрнатилди. Ушбу гидротурбинали генератордан ишлаб чиқилган электр энергияси ушбу цехнинг маиший-маъмурий биносини электр энергиясига бўлган эҳтиёжини 60% га таъминлайди. Ушбу қурилма афзаллиги экологик жиҳатдан зарарсиз, атмосферага зарарли чиқиндилар чиқмайди.  

2025 йилда ҳам ОКМКда “Яшил иқтисодиёт”га ўтиш ишлари жадаллик билан давом эттирилади.

ОКМК Ахборот хизмати