Нигериядаги сирли ҳолат ортидан Швейцария ва Уганда баҳслашмоқда
Нигерияда Эбола вирусини юқтирган бемор, Абужада фаолият юритаётган швейцариялик дипломатнинг угандалик аёли Конго Демократик Республикасига саёҳат қилмаган.
Бу ҳақда жума куни Швейцария ҳукумати “Reuters” агентлигига берган баёнотида маълум қилиб, илгари Уганда томонидан берилган хабарларни рад этди. Ваҳоланки, пайшанба куни Швейцария Ташқи ишлар федерал департаменти бу жувон Швейцария фуқароси экани, вирусни турмуш ўртоғи билан бирга касаллик қайд этилмагани айтилаётган Угандага қилган сафари чоғида юқтирган бўлиши мумкинлигини билдирган. Уганда расмийлари эса Нигерияда хасталанган аёл май ойи ўрталарида эпидемия бошланган ҳамда касаллик тарқалиш тезлиги бўйича рекорд ўрнатган шарқий Конгода бўлганини даъво қилган.
Жаҳон соғлиқни сақлаш ташкилоти (ЖССТ) ва Африка касалликларни назорат қилиш маркази пайшанба куни аёл Конгога боргани тасдиқланган маълумотга эга эмаслигини маълум қилди. Натижада Швейцария ташқи ишлар маҳкамаси жуфтлик КДРга бормаганини расман аниқлаштирди.
Угандада май ва июнь ойларида асосан Конгодан ўтган 20 нафар фуқарода Эбола ҳолати қайд этилган, август ойида эса ЖССТ мамлакатни вирус бартараф этилган ҳудуд дея эълон қилган.
Уганда ҳукумати матбуот котиби Алан Касужжа мамлакатда ҳеч қандай Эбола ҳолати йўқлиги, агар аниқланса, бу ҳақда жамоатчиликка очиқ маълум қилинишини таъкидлади. Нигерияда сўнгги ўн йил ичида илк бор қайд этилган мазкур ҳолат эпидемия Африканинг тўрт мамлакати – Конго, Уганда, Кения ва Нигерияга тарқалганини кўрсатади. Африка касалликларни назорат қилиш ва олдини олиш маркази маълумотига кўра, эпидемия оқибатида тахминан 4700 киши ҳалок бўлган.
Ф.Яхшибоева, ЎзА
