Мурожаатлар ечими ва бандлик — устувор вазифа
Бухорода “Миллий тикланиш” демократик партияси вилоят Кенгаши ҳузуридаги “Аёллар ва Ёшлар қаноти” ҳамда “Сиёсатчи аёллар” клубининг 2026 йилнинг тўққиз ойидаги фаолияти сарҳисоб қилинди.
Бугун хотин-қизлар ва ёшларни қўллаб-қувватлаш, уларнинг бандлигини таъминлаш, касб-ҳунарга йўналтириш ҳамда жамият ҳаётидаги фаоллигини ошириш масалаларига алоҳида эътибор қаратилмоқда. Президент Шавкат Мирзиёев ташаббуси билан илгари сурилаётган инсон қадрини улуғлаш, аҳоли муаммоларини маҳаллабай ўрганиш ва уларга манзилли ечим топишга қаратилган ёндашувлар бу борадаги ишларнинг муҳим йўналишларидан ҳисобланади. Шу нуқтаи назардан, партиянинг хотин-қизлар ва ёшлар билан ишлаш тизимида амалга оширилган ишлар, эришилган натижалар ва келгусидаги вазифалар муҳокамаси амалий аҳамият касб этди.
Ҳисобот даврида тарғибот тадбирлари, давра суҳбатлари, учрашувлар, мақсадли лойиҳалар ва назорат-таҳлил ўрганишлари орқали аҳолини қийнаётган масалаларни аниқлаш ҳамда уларни ҳал этишга қаратилган ишлар олиб борилди.
Хотин-қизлар ва ёшларнинг бандлигини таъминлаш, уларнинг касбий кўникмаларини ривожлантириш ҳамда даромад манбаига эга бўлиши учун имкониятлар яратишга алоҳида эътибор қаратилди. Жумладан, “Хизмат — беминнат” лойиҳаси доирасида маҳаллаларда истиқомат қилувчи, “Аёллар дафтари” ва “Ёшлар дафтари”га киритилган, шунингдек, вақтинча ишсиз фуқаролар учун бепул касб-ҳунар ўргатиш курслари ташкил этилди. Ҳунармандчилик йўналишидаги машғулотларга 94 нафар хотин-қиз, аниқ фанлар бўйича ўқув курсларига эса 40 нафар ёш жалб қилинди.
Бу каби ташаббусларнинг аҳамияти шундаки, касб ўрганиш инсонга нафақат янги билим ва кўникма, балки мустақил даромад топиш, оила фаровонлигини таъминлаш ва жамиятда ўз ўрнини топиш имконини ҳам беради. Эндиликда бундай лойиҳалар самарадорлигини баҳолашда уларга жалб қилинганлар сони билан бирга, курсларни тамомлаган фуқароларнинг ишга жойлашиши ва ўзини ўзи банд қилиши каби натижалар ҳам муҳим аҳамиятга эга.
Партиянинг 2025–2029 йилларга мўлжалланган Сайловолди дастурида белгиланган вазифалар ижроси доирасида “Уйма-уй” лойиҳаси ҳам амалга оширилди. Унда 1 минг 819 та хонадонга ташриф буюрилиб, аҳолининг бандлик, кредит олиш, касбга йўналтириш, соғлиқни сақлаш, ижтимоий ҳимоя ва уй-жой билан боғлиқ масалалари ўрганилди.
Хонадонбай ўрганишлар аҳоли эҳтиёжларини бевосита жойида аниқлаш, муаммоларни умумий ҳисоботлар доирасидан чиқариб, аниқ инсон ва оила манфаатлари нуқтаи назаридан кўриб чиқиш имконини беради.
Аҳоли билан “маҳаллабай” ва “фуқаробай” ишлаш тизимини такомиллаштириш мақсадида 382 та сайёр қабул ва учрашув ўтказилиб, 6 минг 609 нафар фуқаро қамраб олинди. Келиб тушган 597 та мурожаатнинг 545 таси ижобий ҳал этилди.
Бу — мурожаатларнинг қарийб 91,3 фоизи ижобий ечим топганини англатади. Айни пайтда қолган мурожаатлар бўйича ишларни давом эттириш, ҳар бир масаланинг ечими ва натижасини назорат қилиш ҳам муҳимдир. Зеро, аҳоли билан мулоқотнинг самараси фақат қабуллар сони ёки мурожаатлар статистикаси билан эмас, балки инсонлар ҳаётида юз берган аниқ ўзгаришлар билан ўлчанади.
“Аёллар дафтари” ва “Ёшлар дафтари”га киритилган фуқароларнинг муаммоларини ўрганиш ва ҳал этиш бўйича ҳам тегишли ишлар амалга оширилди. Бу жараёнда аҳолининг ижтимоий ҳимояга муҳтож қатламларини қўллаб-қувватлаш, уларнинг бандлигини таъминлаш ва мавжуд имкониятлардан самарали фойдаланишига кўмаклашиш масалаларига эътибор қаратилди.
Йиғилишда “Сиёсатчи аёллар” клуби раҳбари, халқ депутатлари Бухоро вилояти Кенгаши депутати Абиra Хусейнова 2026 йилнинг тўққиз ойи якунлари бўйича ҳисобот бериб, амалга оширилган ишлар, эришилган натижалар ва келгуси режалар ҳақида маълумот тақдим этди.
Тадбирда сўзга чиққан партия вилоят Кенгаши раисининг ўринбосари Гулчеҳра Шарипова хотин-қизлар ва ёшларнинг ижтимоий-сиёсий ҳамда иқтисодий фаоллигини янада ошириш, аҳоли муаммоларини депутатлар билан ҳамкорликда тизимли ҳал этиш ва жойлардаги ишларнинг самарадорлигини кучайтириш юзасидан тавсия ва кўрсатмалар берди.
Йиғилиш якунида белгиланган вазифалар ижросини таъминлаш, аҳоли билан мулоқотни кучайтириш ҳамда хотин-қизлар ва ёшларни қўллаб-қувватлашга қаратилган ишларни изчил давом эттириш зарурлиги таъкидланди.
Зеро, хотин-қизлар ва ёшларнинг бандлиги, ташаббускорлиги ва жамият ҳаётидаги фаол иштироки ҳудуд тараққиётининг муҳим омилларидан биридир. Шу боис ҳар бир мурожаатнинг ечими, ҳар бир касбга йўналтирилган инсоннинг келгуси тақдири ва ҳар бир амалий ташаббуснинг натижасига эътибор қаратиш партия тузилмалари олдидаги устувор вазифалардан бўлиб қолади.
Зариф Комилов, ЎзА мухбири
