Фуқароларнинг ҳуқуқ ва эркинликларини ҳимоя қилиш, шунингдек, одил судловга эришишда суд-экспертлик фаолияти муҳим аҳамиятга эга. Шу боис, жисмоний ва юридик шахсларнинг суд экспертиза имкониятларидан фойдаланишлари учун қулай ва кенг шароитлар яратилмоқда.

Сирдарё вилоят адлия бошқармасида ўтказилган семинарда суд экспертиза фаолиятини такомиллаштириш, соҳада амалга оширилган ишлар ва келгусидаги устувор вазифалар муҳокама қилинди. Иштирокчиларга Адлия вазирлиги ва Х.Сулаймонова номидаги Республика суд экспертизаси маркази масъуллари суд экспертиза ташкилотларининг жиноятчиликка қарши курашиш ва фуқароларимизнинг ҳуқуқларини ҳимоя қилишдаги ўрни, шунингдек, амалга оширилган ислоҳотлар ҳақида батафсил маълумот берилди. 

Марказда олиб борилган тадқиқотлар ва ишланмалар натижасида, кейинги 4 йилда 20 та янги экспертиза тури яратилиб, улар суд амалиётига киритилди. Суд экспертиза турлари 44 тадан 64 тага, мутахассислик йўналишлари эса 106 тага кўпайди. 

Тадбирда илғор хорижий тажрибаларни ҳисобга олган ҳолда, суд экспертизанинг янги турлари ва методикаларини амалиётга жорий этиш бўйича фикр алмашилди ва келгуси режалар белгиланди. 

Ғулом Примов, ЎзА мухбири.