Миллий терма жамоамизда яна бир италиялик мутахассис иш бошлади
Футбол бўйича Ўзбекистон миллий терма жамоаси бўлажак Жаҳон чемпионати олдидан "Миллий футбол маркази"да навбатдаги йиғинини ўтказмоқда.
АҚШ, Канада ва Мексика яшил майдонларида ўтадиган мазкур мундиалга муносиб тайёргарлик кўриш мақсадида ташкил этилган ушбу йиғин давомида Ўзбекистон миллий терма жамоасида ҳужумчилар билан ишлаш бўйича янги италиялик мураббий Роландо Бьянки фаолиятини бошлади.
Маълумот учун, италиялик ушбу собиқ футболчи фаолияти давомида “Аталанта”, “Кальяри”, “Режжина”, “Манчестер Сити”, “Торино”, “Болонья” ва “Мальорка” клублари шарафини ҳимоя қилган. Шунингдек, у Италиянинг турли ёшдаги терма жамоаларида ҳам тўп сурган.
Умид қиламизки, Роландонинг термамиз сафидаги фаолияти жамоамиз ҳужумчилари тажрибасини янада оширишга ҳизмат қилади.
Ҳозирда йиғинда маҳаллий чемпионатда фаолият юритаётган футболчиларимиз машғулотларда иштирок этаётган бўлса, жамоа асосини ташкил этувчи легионер футболчилар 26 майга қадар жамоа сафига келиб қўшилиши кутилмоқда.
Шундан сўнг, терма жамоа 26 май куни Америка Қўшма Штатларига йўл олади. У ерда жамоа бир қатор тайёргарлик машғулотларини ўтказиб, 1 июнь куни Канада термасига қарши ўртоқлик учрашувида майдонга тушади. Ушбу баҳс жамоанинг тайёргарлик даражасини текширишда муҳим аҳамият касб этади. ФИФА талабига кўра, якуний қайднома 30 майга қадар тақдим этилади.
Жавоҳир Тошхўжаев,
ЎзА
