Халқаро теннис федерацияси мусобақалар тақвимидан жой олган нуфузли турнирларда мамлакатимизнинг энг кучли ракетка усталари иштирок этаётгани ҳақида хабар бериб ўтган эдик.

Ушбу турнирларнинг бирига Тунис давлатининг Монастир шаҳри мезбонлик қилмоқда. Унда ҳамюртимиз Милана Масленкова W15 тоифасидаги мусобақанинг саралашида мамлакатимиз шарафини муносиб ҳимоя қилмоқда.  

Милана саралаш босқичининг финалида Фижи вакиласи Сирша Брин билан куч синашди ҳамда 5:7, 6:3, 10:5 ҳисобида ғалаба қозонди. Шу тариқа асосий тўр босқичига йўл олган теннисчимиз илк даврада швейцариялик Мари Меттро билан куч синашадиган бўлди.  

Шунингдек, бугун, 13 ноябрь куни эркаклар ўртасида мамлакатимизнинг биринчи рақамли теннисчиси Ҳумоюн Султонов Мумбай шаҳрида бошланган М25 таснифидаги турнирнинг биринчи даврасида мезбонлар вакили Адил Каланпур билан рақобатлашса, жуфтлик баҳсларида германиялик Лукас Делиано билан тандемда ҳиндистонлик Иқбал Исҳақ ва Фейсал Камар дуэтини синовдан ўтказади.  

Ҳумоюн ва Лукас жуфтлик баҳсларидаги дастлабки даврадан ўтишса, чорак финал босқичида нейтрал теннисчилар Егорь Агафонов ҳамда Богдан Бобров билан рўбарў келишади.  

Жавоҳир Тошхўжаев,

ЎзА