Мемлекет басшысы «Coals KS» кәсіпорнының жұмысымен танысты
Президент Шавкат Мирзиёев Нөкіс қаласындағы «Coals KS» кәсіпорнының жұмысымен танысты.
Жобаның жалпы құны 16,3 миллион долларды құрайды. Кәсіпорында газоблок пен әк өндіру жолға қойылған. Газоблок өндіру үшін «Нөкіс» еркін экономикалық аймағынан 4,8 гектар жер бөлінген.
Ал әк өндіретін қуаттар «Қараөзек» ауданындағы 4,8 гектар аумақта орналасқан.
Кәсіпорын жылына 300 мың текше метр газоблок және 165 мың тонна әк өндіруге қауқарлы. Бұл ішкі нарықты заманауи құрылыс материалдарымен қамтамасыз етумен қатар, экспортты жолға қоюға да мүмкіндік береді. Өнімдерді Қазақстан мен Түркіменстанға экспорттау жоспарланған.
Өндірісте пайдаланылатын шикізаттың 96 пайызы жергілікті көздерден алынады. Атап айтқанда, кварц құмы, цемент және гипс елдегі кәсіпорындардан жеткізіледі. Бұл өнімнің өзіндік құнын төмендетуге және жеткізілім тұрақтылығын қамтамасыз етуге маңызды ықпал етеді.
Кәсіпорында өндірілетін газоблоктар жеңілдігімен, жылуды сақтау және дыбыс оқшаулау қасиеттерімен ерекшеленеді. Олар кәдімгі күйдірілген кірпіштен 3-4 есе жеңіл болып, құрылыс шығындарын азайтуға мүмкіндік береді.
Қазір кәсіпорында 200 жергілікті тұрғын еңбек етеді. Кәсіпорын осы уақытқа дейін жалпы құны 200 миллион доллар болатын 5 ірі жобаны іске қосты. Тағы 40 миллион долларлық 4 жаңа жоба бойынша құрылыс жұмыстары жүргізіліп жатыр.
Мемлекет басшысы өндіріс барысымен және өнімдермен танысып, кәсіпорынның алдағы жоспарлары туралы ақпаратты тыңдады. Жұмысшылармен еркін пікір алмасты.
Өнімнің өзіндік құнын төмендетумен қатар, оның сапасын жоғары деңгейде сақтау, өндіріс көлемі мен экспорттық мүмкіндіктерді кеңейту, қызметкерлердің біліктілігін тұрақты арттырып отыру маңызды екені атап өтілді. Кәсіпорын басшылығы мен сала жауаптыларына тиісті ұсыныстар мен тапсырмалар берілді.
