Xалқаро хотин-қизлар куни арафасида давлатимиз раҳбари томонидан Боёвут туманидаги "Болғали Қилич ака" фермер хўжалиги раҳбари Гулчеҳра Қаршибоеванинг қишлоқ хўжалик соҳасида эришган ютуқлари эътироф этилиб, давлатимизнинг юксак мукофоти– "Шуҳрат" медали билан тақдирланганди. Бу эса аслида унинг машаққатли меҳнатига берилган юксак баҳо бўлди.
–Тиббиёт техникумини битириб, раҳматли Ғайбулла Қаршибоевга турмушга чиқдим. Бирин-кетин 7 нафар фарзандим туғилди. Аммо набираларни бағрига босадиган, эркалатиб ўйнатадиган бир вақтда турмуш ўртоғимдан ажралиб қолдим. Бу менга катта дарс бўлди. Яқинларим кўмаги ва маслаҳати билан турмуш ўртоғим раҳбарлик қилган "Болғали Қилич ака" фермер хўжалигининг раҳбарига айландим. Уддалай оларканманми, деган иккиланишлар бўлган. Ҳаёт муаллим, деб бежизга айтишмас экан,–дейди Гулчеҳра Қаршибоева.– Давлатимиз раҳбарининг Хотин-қизлар куни муносабати билан оддийгина мендек аёлга кўрсатган ҳурмати, эътиборидан рости бошим кўкка етди.
Ҳаёт бир текисда кетмаганидек, Гулчеҳра Қаршибоеванинг муаммолари ҳам кўп бўлди. Уни сабр-тоқат билан енгиб ўтишга ҳаракат қилди. Омадни қарангки, ерга умид билан экилган буғдойдан, чигитдан яхши ҳосил олиб туманда "Олтин фермер" мақомига эришди. Ана шунга ҳам бу йил 10 йилча бўлиб қолди.
Ерга меҳр қўйиш, ундан кутилгандан кўра кўпроқ ҳосил олишнинг ўзи бўлмайди. Бу борада тажрибали агроном, қишлоқ хўжалиги ходимлари, уста миришкорларнинг маслаҳати анча фойда берди. Чунки, қишлоқ хўжалиги соҳасида агротехник тадбирларни яхши билмасдан, қишда экин экиладиган далага яхоб бермасдан, кеч кузда экилган буғдойга чилла сувини қўймасдан яхши натижага эришиб бўлмаслигини билгач, қишни-қиш, ёзни-ёз демай, ҳаловатидан кечиб бўлса-да, яхши натижаларни қўлга киритди. Ер шўрини ювиш, ички зовурларни тозалаш ишларини тизимли ташкил этиши натижасида хўжалик майдонларининг бонитетини 51 баллдан 61 баллга кўтарди.
Бунинг натижасида у пахта ҳосилдорлигини 25-35 центнердан 32-40 центнерга, ғалла ҳосилдорлигини 80-100 центнерга етказди. Биргина ўтган йили 36 гектар ерга чигит қадаб, ундан 137 тонна пахта олиб, шартномавий режани 100-124 фоизга, 44 гектар ерга буғдой экиб, ундан 118 ,2 тонна сара дон олиб, шартномавий режани 104-151 фоизга бажарди. Бундан ташқари 1,2 тонна пилла етиштирди. Фермер хўжалигининг рентабеллик даражасини 28 фоиздан 58 фоизга кўтарди. Шунга яраша хўжаликнинг соф даромади 512 миллион сўмни ташкил этди.
Олинган даромади ҳисобидан хўжаликнинг моддий-техника базасини мустаҳкамлаш мақсадида 2 та трактор, 3 та тиркама, 1 “BYD” электр автомобилини ва бир қатор қишлоқ хўжалиги техникалари сотиб олди. Фермер хўжалигининг бир нафар ишчисига уй-жой қуриб берди. 5 нафар ишчисига 50 миллион сўм миқдорида ҳомийлик ишларини амалга оширган бўлса, маҳалласидаги 5 нафар фуқарога 2,5 миллион сўмдан, 5 нафар фуқарога 0,5 тонна миқдорида буғдой тарқатди. Бундан ташқари, маҳалладаги табиий газ қувурини янгилашга, кам таъминланган оила фарзандларидан 2 нафарининг никоҳ ва 3 нафарининг суннат тўйларини ўтказишга ҳомийлик ёрдамини кўрсатди.
Гулчеҳра Қаршибоева 2023 йилда Республикада ўтказилган "Ишбилармон аёл" кўрик-танловнинг вилоят босқичи ғолиби бўлган бўлса, 2024 йил октябрь ойида бўлиб ўтган сайловда иккинчи бор туман Кенгаши депутатлигига сайланди.
–Айни вақтда фермер хўжалигимда 6 нафар ишчи доимий иш билан таъминланган бўлса, мавсумда улар сони 50-60 нафарга етади,–дейди фермер.
Бугун Гулчеҳра Қаршибоеванинг бир этак набираси, ишлайдиган иши, ҳурмат қиладиган, эъзозлайдиган маҳалладошлари бор. "Чин бахт, аслида шу бўлса керак" дейди у.
Бу йил фермернинг режалари катта. 38 гектар ерга экилган ғалладан ўтган йилгиданда кўпроқ ҳосил кўтармоқчи. Айни вақтда 35 гектар дала майдонига чигит экиш учун ерни шудгорлаш ва тайёрлаш ишлари билан банд. Чунки, у давлатимиз раҳбари томонидан билдирилган ишончни оқлашга ҳаракат қилмоқда.
Ғулом Примов,
ЎзА мухбири