Ўзбекистон Республикаси Коррупцияга қарши курашиш агентлигига Саудия Арабистони Подшоҳлиги Назорат ва коррупцияга қарши курашиш идораси (NAZAHA) Президенти Мазин Ал Кахмус ташриф буюрди.

Агентлик директори Акмал Бурхонов билан учрашувда икки давлат аксилкоррупция идоралари ўртасида ҳамкорликни  кучайтириш, ўзаро тажриба алмашиш механизм ва йўналишлари муҳокама қилинди. 

Мазин Ал Кахмус Ўзбекистон раҳбарининг сиёсий иродаси билан мазкур соҳада амалга оширилаётган муҳим чора-тадбирларни юқори баҳолади. Ўзбекистоннинг минтақа мамлакатлари орасида соҳада сезиларли ижобий натижаларга эришаётгани, бу эса мамлакатнинг коррупцияга қарши курашишга оид халқаро рейтинг ва индекслардаги ўрни йилдан-йилга кўтарилаётганида акс этаётганини ҳам алоҳида эътироф этди. 

А.Бурхонов аксилкоррупция ислоҳотлари ривожида халқаро ҳамкорликнинг аҳамиятига урғу берди. Хусусан, Саудия Арабистонининг соҳадаги илғор тажриба ва амалиётини яқиндан ўрганиш коррупцияга қарши курашишда янги механизмларни жорий этиш имкониятларини янада кенгайтиришга хизмат қилишини таъкидлаб ўтди. 

Учрашув доирасида Агентлик ва NAZAHA ўртасида икки томонлама ҳамкорликнинг ҳуқуқий асосини яратувчи ўзаро англашув меморандуми имзоланди. Унда коррупциянинг олдини олиш ва унга қарши курашиш соҳасидаги ҳамкорликни мустаҳкамлаш ҳамда иштирокчиларнинг институционал салоҳиятини ривожлантириш ва ошириш кўзда тутилган. 

Томонлар самарали ҳамкорлик йўлга қўйилиши мамлакатларимиз учун бирдай манфаатли эканини алоҳида таъкидлаб, муҳокама этилган ҳар бир йўналиш бўйича аниқ вазифа ва режаларни белгилаб олди. 

Н.Абдураимова, ЎзА