Мария Тимофеева бугун британиялик теннисчи билан куч синашади
Теннис бўйича WTA 250 тоифасига кирувчи турнир 13-19 апрель кунлари Франциянинг Руан шаҳрида бўлиб ўтади. Айни дамда эса ушбу мусобақанинг саралаш баҳслари ўтказилмоқда.
Мария Тимофеева “Open de Rouen” турнирининг асосий тўрга йўлланма тақдим этадиган саралаш мусобақаси финал учрашувида франциялик Хлоэ Пакега қарши кортга чиқди ва 3/6, 6/7(5) ҳисобида имкониятни бой берган бўлса-да, омадли мағлуб (LL) сифатида асосий тўр йўлланмасига эга чиқди.
Ташкилотчилар асосий тўрдан жой олган, лекин мусобақада иштирок эта олмаётган франциялик Элза Жакмонинг ўрнини айнан Марияга тақдим этди.
Айтиш лозим, дунёнинг 59-ракеткаси ҳисобланган Элза жароҳат сабаб мусобақани тарк этди.
Бугун, 13 апрель куни WTA рейтингида 153-ўринда бораётган Мария Тимофеева 1/16 финалда рейтингда 62-поғонани банд этган британиялик Кэти Бултерга қарши кортга чиқади.
Мукофот жамғармаси 283,347 доллардан иборат “Open de Rouen” мусобақалари 19 апрелга қадар давом этади.
Т.Рўзиев,
ЎзА
