Лондонда мустақиллигимизнинг 35 йиллиги нишонланди
Дунёнинг турли мамлакатларида Ватанимиз мустақиллигининг 35 йиллик байрами ўтказилмоқда. Ўзбекистон Республикаси мустақиллигининг 35 йиллигига бағишланган тантанали тадбир Лондон шаҳрида ҳам бўлиб ўтди.
Унда хорижий мамлакатларнинг Буюк Британиядаги элчилари ва дипломатик ваколатхоналари ходимлари, мазкур мамлакат ҳукумати ва парламенти вакиллари, ишбилармон ҳамда академик доиралар намояндалари, шунингдек, юртдошларимиз иштирок этди.
Тадбир давомида Ўзбекистон маданият вазири Озодбек Назарбеков бошчилигидаги санъаткорлар делегацияси иштирокида бой ва ранг-баранг маданий дастур намойиш этилди. Унда Ўзбекистон халқ артистлари Севара Назархон ва Тоҳир Қўзиев, хонанда Баҳром Назаров, “Doppi Twins” гуруҳи ҳамда миллий рақс ансамбли ўзининг бетакрор чиқишларини тақдим этди.
Мусиқий чиқишлар ва миллий рақслар тадбирга кўтаринки кайфият бағишлаб, меҳмонларга ўзбек санъатининг бой тарихи ва замонавий қиёфасини яна бир бор намоён этди. Айниқса, миллий куй-қўшиқлар янграган дамларда залда Ўзбекистонга хос самимият ва илиқ муҳит устувор бўлди. Санъаткорларнинг жонли ижроси хорижлик меҳмонларда ҳам катта қизиқиш уйғотди.
Тадбир иштирокчилари Ўзбекистоннинг бой маданий мероси, миллий қадриятлари ва санъат анъаналарига юксак баҳо берди. Миллий рақс ансамблининг чиқишлари эса ўзбек халқининг асрлар давомида шаклланган нафосати, шижоати ва эстетик дидини намоён этди. Кеча давомида замонавий Ўзбекистоннинг маданий салоҳияти ва дунёга очиқлиги намоён бўлди.
Тадбир нафақат мустақиллик байрами, балки Ўзбекистон ва Буюк Британия ўртасидаги маданий-гуманитар алоқаларни янада мустаҳкамлашга хизмат қилувчи муҳим мулоқот майдонига айланди. Меҳмонлар Ўзбекистоннинг бугунги тараққиёти, юртимизда амалга оширилаётган ислоҳотлар ва янги имкониятлар ҳақида ҳам фикр алмашди.
Тантанали кеча давомида Ўзбекистоннинг миллий тимсоллари, урф-одатлари ва қадриятларини халқаро жамоатчиликка кенгроқ танитишга алоҳида эътибор қаратилди. Тадбир иштирокчиларига Ўзбекистондан махсус таклиф этилган ошпазлар жамоаси томонидан тайёрланган миллий таомларимиз тортиқ этилди.
Лондондаги ушбу тантана Ўзбекистон мустақиллиги йилдан-йилга халқаро майдонда кенг нишонланаётганининг яна бир ёрқин ифодаси бўлди.
Кеча давомида янграган мусиқа, намойиш этилган миллий санъат ва тортиқ этилган таомлар бир мақсад — Ўзбекистоннинг бетакрор қиёфасини дунёга танитиш ғояси атрофида бирлашди.
Н.Усмонова, ЎзА
