Кураш: Қозоғистон пойтахти XV жаҳон чемпионатига мезбонлик қилади

Қозоғистон пойтахти Остона шаҳрида жорий йил 4–9 ноябрь кунлари миллий спортимиз кураш бўйича катталар ўртасидаги XV жаҳон чемпионати бўлиб ўтади.

Илк бор Остона шаҳрида ўтказилаётган жаҳон чемпионати дунёнинг турли мамлакатларидан энг кучли курашчилар, мураббий ва ҳакамларни, миллий федерациялар раҳбарларини ҳамда спорт мутахассисларини бир майдонга жамлайди.

Остонадаги жаҳон чемпионати доирасида Халқаро кураш ассоциациясининг бошқарув қўмитаси йиғилиши ва XXII навбатдаги Конгресси ташкил этилади.

Шунингдек, тадбирлар дастуридан IKA антидопинг, ҳакамлик ва мураббийлик семинарлари ҳамда халқаро ҳакамлик имтиҳонлари ўрин олган. Жаҳон чемпионати спортчиларга WSP рейтинги учун қимматли очколарни тақдим этади.

Шу кунларда иштирокчиларни рўйхатга олиш ишлари Халқаро кураш ассоциациясининг тегишли тизимлари орқали амалга оширилмоқда.

Т.Рўзиев,

ЎзА