Кубада ёнилғи тугади
Мамлакат энергетика ва кончилик вазири Висенте де ла О Леви “Mesa Redonda” теледастурида маълум қилишича, Кубада ёнилғи захираси бутунлай тугаб қолган.
– Бизда ёнилғи мойи мутлақо йўқ, дизель ёнилғиси ҳам бутунлай тамом бўлди, – деди вазир. – Фақат мамлакат ҳудудидаги конлардан чиқадиган йўлдош газ ва ишлаб чиқариш ўсиб бораётган маҳаллий хом нефть бор.
Вазирнинг сўзларига кўра, мамлакат декабрь ойидан бери ёнилғи таъминотини олмаган. Ягона муҳим юк, Россиядан хайрия шаклида юборилган тахминан 100 000 тонна нефть оролга қарийб 4 ойлик танаффусдан сўнг етиб келди. Бу миқдор узилишни вақтинча камайтириш имконини берди.
– Шу захирани май ойи бошигача етказдик, кейин ёнилғи тугади, – дея тушунтирди О Леви.
Амалдор энергия эҳтиёжи бир марталик таъминот билан ўлчанмаслиги зарурлигини таъкидлади. У Гаванада кунига 20-22 соатлик электр узилиши билан боғлиқ жуда оғир вазиятни тан олди.
Мулозим қўшимча қилишича, ҳозир мамлакат энергетика тизими фақат иссиқлик электр станциялари, газ турбиналари ва қуёш электр станциялари орқали ишлаяпти, захира қуввати йўқ. Бундан ташқари маҳаллий нефть ва газ ишлаб чиқариш ички талабнинг фақат бир қисминигина қоплайди.
29 январь куни АҚШ Президенти Дональд Трамп Кубага нефть етказиб берувчи мамлакатлардан импорт қилинадиган тарифни тасдиқловчи фармонни имзолаган. Шунингдек, Гаванадан миллий хавфсизликка нисбатан таҳдид туфайли фавқулодда ҳолат эълон қилган.
Орол ҳукумати Қўшма Штатлар энергетика қамали орқали мамлакат иқтисодиётини бўғиш ва одамларнинг яшаш шароитини чидаб бўлмас ҳолга келтиришга ҳаракат қилаётганини даъво қилмоқда.
С.Раҳимов, ЎзА
