Креатив ғоялар мусобақаси
Гулистон давлат педагогика институтида бўлиб ўтган “Энг яхши креатив ғоя” танлови нафақат навбатдаги интеллектуал беллашув, балки ёшлар тафаккури, ташаббускорлиги ва инновацион фикрлаш салоҳиятини намоён этган муҳим майдонга айланди. Кўтаринки руҳ, соғлом рақобат ва илҳомбахш муҳит ҳукм сурган мазкур тадбирда талабалар ўзларининг энг долзарб ва истиқболли лойиҳалари билан иштирок этдилар.
Танловда қатнашган ёшлар турли йўналишларда — таълимни рақамлаштириш, ижтимоий муаммоларга ечим топиш, стартап ғоялар, экологик ташаббуслар ҳамда инновацион педагогик усуллар бўйича ўз таклифларини илгари сурдилар. Айниқса, амалиётга жорий этиш мумкин бўлган, иқтисодий самарадорликка эга ва жамият учун фойдали лойиҳалар ҳакамлар ҳайъати томонидан алоҳида эътироф этилди.
Танлов жараёни бир неча босқичда ташкил этилди. Дастлаб иштирокчилар томонидан тақдим этилган лойиҳалар саралаб олинди, кейин эса финал босқичида муаллифлар ўз ғояларини ҳимоя қилиб, савол-жавобларда фаол иштирок этдилар. Бу эса ёшларнинг нафақат назарий билимлари, балки таҳлил қилиш, ўз фикрини эркин баён этиш ва жамоат олдида чиқиш кўникмаларини ҳам синаб кўриш имконини берди.
Қизғин ва муросасиз кечган баҳс-мунозаралар, ҳар бир лойиҳанинг пухта таҳлили ва атрофлича муҳокамасидан сўнг ҳакамлар ҳайъати якуний қарорга келди. Унга кўра, танловда Мунира Турдиева энг юқори натижани қайд этиб, биринчи ўринни эгаллади. Шунингдек, Бекзодхон Жалолиддинов иккинчи ўринга муносиб кўрилди, Зулфия Абдулҳақова эса учинчи ўрин соҳибига айланди.
Ғолиб ва совриндорлар республика босқичида иштирок этиш учун йўлланмаларни, шунингдек, ташкилотчилар томонидан диплом ва эсдалик совғаларини қўлга киритдилар. Бу эса улар учун янги имкониятлар эшигини очиб, ғояларини кенгроқ майдонда намоён этишга замин яратади.
Ғулом Примов, ЎзА мухбири
