Шу йил 5 март куни Президент раислигида ўтказилган Коррупцияга қарши курашиш бўйича миллий кенгаш йиғилишида соҳадаги камчиликлар танқид қилиниб, устувор вазифалар белгилаб берилган эди. Айни кунларда барча ташкилотлар ушбу йиғилишдан келиб чиқиб, ўз олдидаги вазифаларини белгилаб олмоқда.

Жумладан, Ўзбекистон Экологик партиясининг парламент қуйи палатасидаги фракцияси томонидан фракция олдида турган устувор вазифалар муҳокамасига бағишланган йиғилиш ўтказилди.

Йиғилишда қайд этилганидек, мамлакатимизда қонунчиликнинг такомиллаштирилиши, коррупцияга қарши курашиш бўйича алоҳида давлат органининг ташкил этилиши, вазирлик ва идоралар фаолиятининг рақамлаштирилиши натижасида сўнгги 7-8 йилда бу йўналишда муайян ижобий натижаларга эришилди.  

Коррупция масаласи жамият муҳокамасига олиб чиқилиб, ОАВнинг роли оширилди. Натижада халқаро очиқлик рейтингида Ўзбекистон 138 поғона юқорилаб, Марказий Осиёда биринчи, дунёда 30 ўринга кўтарилди.  

Президент раислигидаги йиғилишда давлат раҳбари 55 та аниқ мақсадга йўналтирилган ташаббусларни илгари сурди.

Улар доирасида 5 та қонун, 12 та фармон ва қарорлар ишлаб чиқилади. Коррупцияга қарши курашишда парламент, Миллий ва ҳудудий кенгашлар, фуқаролик жамияти институтларининг роли оширилиши айтиб ўтилди.

Парламент киберкоррупцияга қарши самарали курашиш мақсадида халқаро тажрибани ўрганиб, махсус қонунчилик асосларини ишлаб чиқиш устида ишлаши лозимлиги қайд этилди.  

Йиғилишда депутатлар, партия фаоллари коррупцияга қарши курашиш нафақат давлат идоралари, балки жамиятнинг ҳар бир аъзоси учун устувор вазифа бўлиши кераклиги, ҳуқуқий онг ва фаолликни ошириш орқалигина бу иллатни таг-томири билан йўқ қилиш мумкинлигини таъкидлади.

Билдирилган таклиф ва мулоҳазалардан келиб чиқиб, партия ва фракциянинг коррупцияга қарши курашиш борасидаги вазифалари белгилаб олинди.  

Муҳтарама Комилова,

ЎзА