КХДР: Ядровий қуролсизланиш АҚШ иттифоқчиларидан бошлансин
Шимолий Корея ҳукумати НАТО саммити якунларини кескин танқид қилди. Пхеньян Қўшма Штатлар ва унинг иттифоқчиларини ҳарбий блокларни кучайтириш, қуролланиш пойгасини жадаллаштириш, Европа ва Осиё-Тинч океани минтақасида кескинликни авж олдиришда айблади.
Корея Марказий телеграф агентлиги (KCNA) тарқатган баёнотда Пхеньян ўзининг ядровий дастури суверен ҳуқуқ эканини таъкидлаб, қуролсизланиш талаблари аввал АҚШ ҳимоясидаги давлатларга қаратилган бўлиши кераклигини билдирди. Хусусан, КХДР Жанубий Корея ва Япониянинг ядровий имкониятларини кенгайтиришга интилаётганини, шунингдек, НАТОнинг ядровий шериклик дастурида иштирок этаётган мамлакатлар ҳам қуролсизланиш жараёнига жалб қилиниши лозимлигини маълум қилди.
Бу ҳафта Туркияда ўтган НАТО саммитида альянс давлатлари мудофаа соҳасида 50 миллиард доллардан ортиқ қийматга эга янги харидлар ва саноат ҳамкорлиги бўйича келишувларни эълон қилди. Шунингдек, Жанубий Корея президенти Ли Чжэ Мён Сеул қурол-яроғ ишлаб чиқариш ва замонавий технологиялар соҳасида НАТО давлатлари билан ҳамкорликни кенгайтиришга тайёрлигини билдирди.
Пхеньян эса альянсни “уруш ва қарама-қаршиликка хизмат қилувчи тузилма” деб атаб, ўз ядровий салоҳиятини янада кучайтиришини маълум қилди. КХДР етакчиси Ким Чен Ин топшириғи билан мамлакат ядровий кучларини ҳам миқдор, ҳам сифат жиҳатидан модернизация қилиш чоралари бошлангани қайд этилди.
Мусулмон Зиё, ЎзА
