20 ёшли футболчимиз Абдуқодир Ҳусанов Франциянинг "Ланс" клубидан 33,6 миллион фунт стерлинг эвазига “шаҳарликлар“ сафига қўшилди ва Англия Премьер лигасида ўйнайдиган илк ўзбек футболчисига айланди.
Унинг ёш бўлишига қарамай, босиб ўтган катта йўли бор. А.Ҳусановнинг футболдаги фаолияти етти ёшида "Тошкуч"дан Тошкентнинг “Бунёдкор“ клуби академиясига ўтганида бошланган. У дарҳол ўзидан икки ёш катта бўлган болалар билан ўйнай бошлайди. Бироқ 17 ёшида пойтахт клуби унинг учинчи даражали ўринбосарлар жамоаси сафидан бошқа тоифага ўтиши учун жисмонан тайёр эмаслигини айтган.
Бу ҳолатдан Абдуқодир ва унинг отаси, собиқ футболчи Ҳикмат Ҳошимов тушкунликка тушмайди. Балки, ўғлининг янада камол топиши учун Беларуснинг “Энергетик-БГУ“ жамоасига юборади. Ушбу клуб ёш футболчи дебют қилиши учун бир йил кутиши керак бўлишига қарамай, уни сафга қўшиб олади. Сабаби, Беларусда футболчилар 18 ёшга тўлмагунча профессионал шартномалар имзолай олмас эди. Ўйнаш ҳуқуқига эга бўлгач, А.Ҳусанов жамоада тезда ўз ўрнини топади ва “Энергетик-БГУ“ клуби сафида 37 та ўйинда майдонга тушади.
Ёш Абдуқодир 2023 йил март ойида 20 ёшгача бўлган футболчилар ўртасида ўтказилган Осиё кубогида терма жамоадаги иштироки ва мусобақадаги ёрқин ўйинлари билан тезда ўзбек мухлислари қалбидан жой олди. Ўшанда футболчимиз терма жамоамиз билан биргаликда тарихий чемпионликни қўлга киритган эди. Натижада, Ўзбекистон 2023 йилнинг май ойида U20 тоифасидаги Жаҳон чемпионатида ўйнаш ҳуқуқига эга бўлган.
Дунё биринчилигида Франциянинг "Ланс" клуби скаут менежери Баптисте Фавиэр Абдуқодирнинг ҳаракатларини кузатди. Ўша йилнинг июль ойида эса "Ланс" уни атиги 100 минг еврога сотиб олди. "Ланс" жамоасига кўчиб ўтган футболчимиз турли мусобақаларда жамоа таркибида 31 та ўйинда майдонга тушди. Мазкур клубда бир ярим йил фаолият олиб борган Абдуқодир Ҳусанов жорий йилги трансфер мавсумида “Манчестер Сити”га жами 50 миллион евро эвазига ўтди ва 2029 йилнинг ёзигача давом этадиган шартнома имзолади. Шуни таъкидлаб ўтиш лозимки, томонларда ўзаро келишган ҳолда ҳамкорликни яна бир йилга узайтириш имконияти бор.
Умид қиламизки, Абдуқодир Ҳусанов Англия Премьер лигаси, Европа чемпионлар лигаси ва қолган нуфузли мусобақаларда ёрқин ўйинлар намойиш этади.
Жавоҳир Тошхўжаев,
ЎзА