“Карьера куни–2026” меҳнат ярмаркаси ўтказилди
Жиззах политехника институтида ўтказилган навбатдаги “Карьера куни–2026” тадбири оддий ярмарка эмас, балки ёшларнинг эртанги тақдирига дахлдор муҳим майдонга айланди. Бу ерда дипломга эга бўлишнинг ўзи етарли эмаслиги, ҳақиқий муваффақият меҳнат бозори талабларига мослашишдан бошланиши яна бир бор намоён бўлди.
Талаба ва битирувчилар учун ташкил этилган ушбу мулоқот майдони иш излаш жараёнини осонлаштириш, иш берувчилар билан юзма-юз суҳбат орқали ўзаро ишончни мустаҳкамлашга хизмат қилди. Бу эса назарий билим билан амалиёт ўртасидаги узилишни қисқартиришда муҳим қадам бўлди.
Рақамлар эътиборга молик: жорий йилда институтни икки мингдан ортиқ ёш мутахассис битириши кутилмоқда. Уларнинг катта қисми маҳаллий ёшлардан иборат экани эса ҳудуд меҳнат бозорини янги куч ва янги ғоялар билан бойитиш имконини англатади. Бу — вилоят иқтисодиёти учун ҳам катта захира демакдир.
Тадбирда иштирок этган ўнлаб йирик корхона ва ташкилотлар ёшлар билан бевосита мулоқот қилди. Саноатдан тортиб хизмат кўрсатишгача бўлган турли соҳа вакиллари ўз эҳтиёжларини очиқ билдирди, талабалар эса ўз имкониятларини намоён этишга ҳаракат қилишди. Ана шу очиқ мулоқот жараёни келгусида самарали ҳамкорлик учун мустаҳкам пойдевор яратди.
Институт раҳбарияти таъкидлаганидек, бу каби ташаббуслар фақат иш ўринларини таклиф этиш билан чекланмайди. Улар ёшларда касбга масъулият, жамиятга дахлдорлик ҳиссини шакллантиришга хизмат қилади. Чунки бугунги талаба — эртанги тараққиётни белгилайдиган кучдир.
Вилоят мутасаддилари ҳам ёшлар бандлигини таъминлаш масаласига алоҳида урғу бериб, уларни қўллаб-қувватлаш давлат сиёсати даражасидаги устувор йўналиш эканини қайд этишди. Бу эса бундай тадбирлар тасодифий эмас, балки изчил ислоҳотларнинг мантиқий давоми эканини кўрсатади.
[gallery-28426]
Хулоса қилиб айтганда, “Карьера куни–2026” ёшлар учун навбатдаги имкониятлар эшигини очди. Энг муҳими, у иш излаётган битирувчи билан кадрга муҳтож иш берувчини бир нуқтада учраштира олди. Ана шу учрашувлар эса эртанги барқарор иқтисодиёт ва ишбилармон жамиятнинг асосини яратади.
А.Қаюмов, Ж.Ёрбеков (сурат), ЎзА
