Камилла Раҳимова Торонтодаги турнирда учинчи босқичга чиқди
Канаданинг Торонто шаҳрида теннис бўйича давом этаётган нуфузли WTA 1000 тоифасидаги “National Bank Open Presented by Rogers” турнирида Ўзбекистон вакили Камилла Раҳимова муваффақиятли иштирокини давом эттирмоқда.
Ҳамюртимиз иккинчи босқич баҳсида тажрибали чехиялик теннисчи Катерина Синяковани мағлуб этиб, мусобақанинг учинчи даврасига йўл олди.
Раҳимова ва Синякова ўртасидаги баҳс кескин курашлар остида ўтди. Илк сет тай-брейкда рақиб фойдасига 6:7(1) ҳисобида якунланган бўлса, иккинчи сетда теннисчимиз мутлақ устунлик қилиб, 6:0 ҳисобида ғалаба қозонди. Ҳал қилувчи учинчи сетда ҳисоб 5:2 бўлиб турган пайтда Синякова жароҳати туфайли учрашувни давом эттира олмади ва ғалаба Камилла Раҳимова ҳисобига ёзилди.
Энди Камилла мусобақанинг учинчи босқичида WTA рейтингида 21-ўринда бораётган россиялик теннисчи Анна Калинскаяга қарши кортга чиқади. Бу баҳс ўзбекистонлик теннисчи учун турнирдаги энг жиддий синовлардан бири бўлиши кутилмоқда.
Жавоҳир Тошхўжаев,
ЎзА
