Камилла Раҳимова Сеулда ғалаба қозонди

Жанубий Кореянинг Сеул шаҳрида теннис бўйича аёллар ўртасида WTA 250 туркумига кирувчи «Korea Open-2026» халқаро турнири ўтказилмоқда. Мусобақанинг яккалик ва жуфтлик баҳсларида мамлакатимиз шарафини Камилла Раҳимова муносиб ҳимоя қилмоқда.

Яккалик баҳсларининг асосий тўрига ташланган қуръа натижасига кўра, Камилла Раҳимова ва яна бир теннисчимиз Полина Кудерметова билан илк босқичда ўзаро куч синашди. Қизғин кечган учрашувда мамлакатимизнинг биринчи рақамли теннисчиси Камилла Раҳимова уч сет якунига кўра 7:6, 4:6, 7:5 ҳисобида ғалаба қозониб, мусобақанинг иккинчи босқичига йўл олди.

Соврин жамғармаси 283 минг 347 АҚШ долларини ташкил этувчи турнирнинг навбатдаги босқичида Камилла Раҳимова америкалик Кэти Волинецга қарши кортга чиқади.

Шунингдек, Камилла Раҳимова «Korea Open-2026» турнирининг жуфтлик баҳсларида нейтрал мақомдаги теннисчи Алина Чараева билан тандем ҳосил қилди. Улар мусобақанинг биринчи босқичида Хитой Тайпейи вакиллари У Фан-Сян ва Чан Хао-Чин жуфтлигига қарши ўйин ўтказади.

Жавоҳир Тошхўжаев,

ЎзА