Жиззахда “Болалик формуласи” мулоқотида 28 та янги ташаббус илгари сурилди
20 ноябрь — Бутунжаҳон болалар куни муносабати билан Жиззах вилоятида “Болалик формуласи” мавзусида очиқ мулоқот ташкил этилди. Унда болаларнинг ҳуқуқлари, манфаатлари ва жамият ҳаётидаги иштирокига доир масалалар муҳокама қилинди.
Тадбир вилоят ҳокимлиги, Ўзбекистон болалар ташкилоти, Ёшлар ишлари агентлиги ҳамда Болалар омбудсмани ҳамкорлигида ўтказилди. Очиқ мулоқотда 100 нафар бола иштирок этди. Мулоқот давомида болалар ўзларини қизиқтирган масалалар юзасидан масъулларга мурожаат қилиб, ўз таклиф ва ташаббусларини ўртага ташладилар.

Эътиборлиси, тадбир давомида ёш авлод вакиллари томонидан жами 28 та муҳим ташаббус ва муаммо илгари сурилди. Бу рақам ортида ёш авлодни ўйлантираётган турли ҳаётий масалалар мужассам. Уларнинг мазмуни эса болалар эҳтиёжлари биргина таълим билан чекланмаслигини кўрсатади.

Хусусан, таълим сифати, саломатликни муҳофаза қилиш ва рақамли хавфсизлик масалалари кўтарилди. Экология, сунъий интеллект ва молиявий саводхонлик ҳам муҳокама марказида бўлди. Болалар бўш вақтини мазмунли ташкил этиш масаласига ҳам эътибор қаратилди. Ёш истеъдодларни қўллаб-қувватлаш бўйича таклифлар ҳам билдирилди.

Болалар ҳаёти билан бевосита боғлиқ бўлган ушбу йўналишлар, хусусан, замонавий ахборот муҳитидаги рақамли хавфсизлик, ёшларни мустақил қарор қабул қилишга ўргатувчи молиявий саводхонлик ҳамда экологик маданият каби масалалар келажак авлод дунёқарашини шакллантиришда муҳим аҳамият касб этади.

Муҳими, болалар бу масалаларни фақат кузатувчи сифатида эмас, фаол иштирокчи сифатида муҳокама қилди. Улар ўз эҳтиёжларини ифодалаш, фикр билдириш ва ечим таклиф этиш имкониятига эга бўлди. Бундай мулоқот болаларда ташаббускорлик ва ижтимоий масъулиятни шакллантиришга хизмат қилади.

Очиқ мулоқот якунида энг яхши таклиф муаллифлари рағбатлантирилди. Уларга Ўзбекистон болалар ташкилотининг анъанавий анжуманида иштирок этиш учун йўлланмалар топширилди. Бу эътироф болаларнинг фаоллигини қўллаб-қувватлаш ва янги ташаббусларга ундаш нуқтаи назаридан аҳамиятлидир.

Мутахассисларнинг таъкидлашича, болалар овозини эшитиш фақат байрам тадбирлари билан чекланиб қолмай, уларнинг таклифларини тизимли ўрганиш ва ижросини назорат қилиш давлат сиёсатининг доимий устувор йўналиши бўлиб қолади. Зеро, бола манфаатларини таъминлаш унинг фикрига ҳам ҳурмат билан муносабатда бўлишни талаб этади.

Жиззахдаги “Болалик формуласи” мулоқоти ана шу ёндашувнинг амалий ифодасидир. Чунки болаларнинг бугунги фикри эртанги жамият қиёфасини белгилашда муҳим ўрин тутади.
Абдужалол Қаюмов, ЎзА мухбири