9 май – Хотира ва қадрлаш куни муносабати билан Тошкент вилояти ҳудудларида ҳам “Ватан равнақи, тинчлиги ва ҳимояси йўлидаги қаҳрамонлик унутилмайди” шиори остида маънавий-маърифий тадбирлар ўтказилмоқда.

Хусусан, вилоят ҳокими Зойир Мирзаев Оққўрғон ва Юқори Чирчиқ туманидаги Иккинчи жаҳон уруши қатнашчиларининг хонадонига бориб, фахрийларга Президентимизнинг йўллаган табригини тантанавор тарзда ўқиб эшиттирди. Шунингдек, 10 минг АҚШ доллари миқдордаги пул мукофоти ҳамда “Иккинчи жаҳон урушидаги ғалабанинг 80 йиллиги” эсдалик юбилей медалини топширди.

Бир пиёла чой устида суҳбат қурилиб, Маданият бўлими хонанда ва созандалари томонидан Ватан мадҳини тараннум этувчи чиқишлар тақдим этилди.

Оққўрғонлик Иккинчи жаҳон уруши қатнашчиси Файзулла ота Нурматов йил 105 ёшга тўлди. Ҳозирда 7 фарзанди, 24 нафар невара ва 40 нафардан ортиқ чевара даврасида ушбу кунларга шукрона айтиб яшамоқда.

[gallery-23264]

Ўша йиллар отахон мактабда таълим олиш билан бирга, ўқитувчи танқислигидан кичик синфларга дарс берган. 1939 йили ҳарбий хизматга чақирилган ва урушга сафарбар қилинган. Польша озодлиги учун бўлган жангларда асирга тушган, у ердан озод бўлгач партизанлар сафида жанг қилишни давом эттирди.  

Асли Жиззах вилоятининг Ғаллаорол туманида туғилган Файзулла отанинг тақдири кейинчалик Оққўрғон билан боғлиқ бўлди. 1945 йилнинг ёзида Ватанга қайтган қаҳрамон аскар оиласининг асосий юкини елкага олиб, укаси ва икки нафар синглисини қарамоғига олди. 1950 йил бошланган кўчма ҳаракатлар сабаб ғаллаороллик 20 дан ортиқ оила Оққўрғонга келганлар орасида Ф.Нурматов оиласи ҳам бор эди. Шундан сўнг у колхозда  меҳнат қилди.

Учрашувда Файзулла ота юртимиз тинчлиги, халқимиз фаровонлигини тилаб дуо қилди. Байрам муносабати билан тўкин дастурхон ёзилди. Намойиш этилган концерт дастури барчага кўтаринки кайфият бағишлади.

А. Мусаев, ЎзА.