Жаҳон чемпионати: совриндорликка даъвогар шахматчи ёшларимиз бугун Европа вакиллари билан куч синашади
Италиянинг Монтесильвано шаҳрида 14, 16 ва 18 ёшгача бўлган ўсмирлар ҳамда қизлар ўртасида ўтаётган “FIDE World Youth Chess Championship 2026” мусобақаларининг 9-тур ўйинлари ортда қолди.
Кеча мазкур жаҳон чемпионатининг 14 ёшгача бўлган қизлар ўртасида ўтган 9-тур мусобақасида совринли ўринлардан бирига даъвогарлик қилаётган ҳамюртимиз Сарвиноз Бекмуратова оқ доналарда АҚШлик Лаура Қиуга қарши баҳс олиб борди.
Мураккаб ва ўта шиддатли кечган ўйинда ҳамюртимизнинг қўпол хатосидан унумли фойдаланган америкалик шахматчи қиз ғолибликни қўлга киритди.
Ушбу ёш тоифасида дона сураётган яна бир шахматчи қизимиз Лазизабону Комилжонова мазкур турда қора доналарда хитойлик Миаоюн Хиани мағлуб этди.
Ушбу натижалардан кейин Сарвиноз Бекмуратова ва Лазизабону Комилжонова 6,5 очко билан 110 нафар иштирокчи орасида қўшимча кўрсаткичларга кўра, 7-8-ўринларни банд этиб турибди. 14 ёшгача бўлган қизлар орасида 7,5 очко жамғарган озарбайжонлик Захра Аллахверди етакчилик қилмоқда.
84 мамлакатнинг 778 нафар ёш шахматчилари иштирокида ўтаётган дунё биринчилигининг 16 ёшгача бўлган қизлар мусобақасида ҳамюртимиздан Руқия Олимова 5,5 очко билан 107 нафар тенгдошлари орасида 30-қаторни, 18 ёшгача бўлган қизлар орасида Мумтозбегим Мансурова 5 очко билан 104 нафар қатнашчи орасида 39-поғонани, 16 ёшгача бўлган ўғил болалар ўртасида Саъдулло Азизов 6 очко билан 150 нафар иштирокчи орасида 24, Рауф Қосимов 5,5 очко билан 28, 18 ёшгача бўлган ўғил болалар ўртасида Акобирхон Саидалиев 5,5 очко билан 131 нафар тенгқурлари орасида 29-поғонада ҳаракатланмоқда.
Бугун, 25 июнь куни жаҳон чемпионатининг 10-тур мусобақасида Сарвиноз Бекмуратова қора доналарда швейцариялик Кристина Жордан билан, Лазизабону Комилжонова оқ доналарда латвиялик Милана Гаилевска билан баҳс олиб боради.
Эслатиб ўтамиз, эртага, 26 июнь куни “FIDE World Youth Chess Championship 2026”нинг сўнгги 11- тур мусобақалари бўлиб ўтади.
Т. Рўзиев, ЎзА
