IT шаҳарча — билим ва имкониятлар манзили
Навоий вилояти Хатирчи туманидаги Фаровон маҳалласида барпо этилган IT шаҳарча ёшларнинг замонавий билим ва касб-ҳунарларни эгаллаши, рақамли технологиялар ҳамда хорижий тилларни ўрганиши учун муҳим масканга айланган.
Мамлакатимизда рақамли иқтисодиётни ривожлантириш, ахборот технологиялари соҳасида малакали кадрлар тайёрлаш ва ёшларни замонавий касбларга йўналтиришга алоҳида эътибор қаратилмоқда. Бу борада ҳудудларда ташкил этилаётган замонавий таълим масканлари ёшларнинг билим олиши ва ўз иқтидорини рўёбга чиқаришига хизмат қилаётир.
Хатирчи туманидаги IT шаҳарча ҳам ана шундай эзгу мақсадларга қаратилган ташаббуслардан биридир. Бу ерда яратилган шароитлар ёшларнинг ахборот технологиялари, дастурлаш асослари ва хорижий тилларни ўзлаштириши, рақамли саводхонлигини ошириши ҳамда келажакда талаб юқори бўлган касбларни эгаллаши учун имконият яратмоқда.
Айниқса, чекка ҳудудларда истиқомат қилувчи ёшлар учун бундай масканларнинг аҳамияти катта. Зеро, замонавий технологияларни ўзлаштириш уларга нафақат билим ва кўникмаларини бойитиш, балки масофадан туриб ишлаш, халқаро таълим ресурсларидан фойдаланиш ва ўз ғояларини амалга ошириш имконини ҳам беради.
Бугунги кунда рақамли технологиялар ҳаётимизнинг барча жабҳаларига жадал кириб бораётган бир пайтда ёшларнинг ушбу соҳага қизиқиши ортиб бормоқда. IT шаҳарчадаги таълим муҳити эса уларнинг қизиқишларини аниқ мақсадга йўналтириш, мустақил изланиш ва янги билимларни ўзлаштиришида муҳим ўрин тутмоқда.
Бир пайтлар олис ҳудудлардаги ёшлар учун орзу бўлиб туюлган имкониятлар бугун уларнинг ўз маҳалласида яратилмоқда. Эндиликда замонавий касбларни ўрганиш, хорижий тилларни пухта эгаллаш ва рақамли дунё имкониятларидан фойдаланиш учун узоқ манзилларга бориш шарт эмас.
Хатирчидаги IT шаҳарча ёшларнинг бўш вақтини мазмунли ташкил этиш, уларни билим олишга рағбатлантириш ва келажак касбига йўналтиришга хизмат қилаётган масканлардан бири бўлиб бормоқда.
[gallery-32166]
Зеро, бугун дастурлашни ўрганаётган, хорижий тилларни ўзлаштираётган ёки янги ғоя устида изланаётган ёшлар эртага мамлакатимиз рақамли иқтисодиёти ривожига ҳисса қўшадиган малакали мутахассислар сафидан жой олиши мумкин.
Сирож АСЛОНОВ (сурат), ЎзА
