Исроил ва ҲАМАС ўртасидаги тинчлик келишувининг биринчи босқичи доирасида маҳбусларни озод қилиш жараёни душанба куни бошланиши кутиляпти.

– Асирдагиларнинг ҳаммаси душанба куни қайтади, – деган АҚШ Президенти Дональд Трамп.

Демак, икки йил аввал ҲАМАС томонидан асирга олинган исроиллик 20 киши уйига қайтади.

– Исроилда бу хабар шодлик ва алам билан қабул қилинди, – деб ёзган Evronews. – Зеро, асирлардан 26 нафари вафот этгани айтилади, иккиси қаердалиги эса номаълумлигича қолмоқда.

– Мен бахтлиман, хурсандлигимдан йиғлаяпман, –деди журналистларга тутқундаги Омри Мираннинг отаси Дани.

Келишувга кўра, Исроил Ғазодаги қўшинини қисман олиб чиқади. ҲАМАС эса асирлар озод қилиниши эвазига Исроилда ушлаб турилган фаластинлик маҳбуслар ҳам қўйиб юборилишини кутяпти.

– Мана, икки йилдирки, уруш олови ичида яшаяпмиз, – дейди фаластинлик шифокор Саид Авод. – Хабарни эшитиб, аввалига ишонмадик. Тасдиқ сўрашга тўғри келди. Энди азоб, ўлим барҳам топади, деган умиддамиз.

Жаҳон озиқ-овқат дастури Ғазодаги оғир гуманитар инқироз туфайли тезроқ халқаро ёрдам етказиш учун вақтни бой бермасликка чақирмоқда.

– Ғазо вайрон бўлган, – дейди шу ерда истиқомат қилувчи Жалол Ал-Ажла. – Уруш бутунлай тугаганига чин дилдан умид қиляпмиз.

БМТ маълум қилишича, секторда кенг кўламли инсонпарварлик амалиётини бошлашга ҳозирлик кўрилмоқда.

<iframe width="650" height="420" src="https://www.youtube.com/embed/oWnj7TqzaP8" title="Isroil va HAMAS kelishuvi: shodlik va alam" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Кенжа Бекжонов, Анвархўжа Аҳмедов, ЎзА