Компаниямиз “ChatGPT OpenAI” собиқ бош директори Сэм Альтман ва ушбу бренд асосчиси Грег Брокманни ишга олади, деб баёнот берди “Microsoft” бош директори Сатья Наделла.
“Мен сунъий интеллект соҳасидаги энг илғор тадқиқотчилар гуруҳига раҳбарлик қилиш учун Сэм Альтман ва Грег Брокман “Microsoft”га қўшилгани ҳақидаги хабарни баҳам кўришдан хурсандман”, - деб ёзган Наделла ижтимоий тармоқда.
Аввалроқ “OpenAI” Альтман жума куни бош директорликдан бўшатилгани ҳақида хабар тарқатган эди. Маълум қилинишича, Сэм директорлар кенгаши билан мулоқотда очиқ бўлмаган, ўзига юклатилган вазифани бажара олмаган. Кейинроқ “Verge” нашри директорлар кенгаши Альтманни ишга қайтариш масаласини муҳокама қилмоқда, деб ёзди.
“ChatGPT” чат-боти ўтган йил ноябрь ойида ишга туширилганда машҳур бўлиб кетган, бир ҳафтага қолмай, миллиондан зиёд обуначини тўплай олган эди.
2015 йил “OpenAI” компанияси раҳбарлари сафига америкалик миллиардер Илон Маск ҳам қўшилган, бироқ кейинроқ у мазкур стартап билан алоқани узган.