Iqtisodiy barqarorlik Farg‘ona turizmining drayveriga aylanmoqda
Farg‘ona vodiysi azaldan nafaqat serhosil zamini va mehnatkash xalqi, balki boy madaniy merosi, hunarmandchilik an’analari va savdo yo‘llaridagi muhim o‘rni bilan ham e’tirof etilgan. Rishton kulolchiligi, Marg‘ilon ipakchiligi, qadimiy shaharlar tarixi va mehmondo‘st muhit bu hududni asrlar davomida sayyohlar uchun jozibador manzilga aylantirib kelgan.
Bugungi kunda esa Farg‘ona yangi taraqqiyot bosqichiga chiqmoqda. Jahonda iqtisodiy barqarorlik, investitsion ishonch va zamonaviy turizm infratuzilmasi hududlar raqobatbardoshligining asosiy mezoniga aylanayotgan bir paytda vodiy ham o‘zining iqtisodiy va turistik salohiyatini izchil namoyon etmoqda.
Xalqaro reyting agentliklari tomonidan Farg‘ona viloyatiga “BB-” darajasidagi “Barqaror” reytingning berilishi bu borada muhim ahamiyat kasb etdi. Mutaxassislar ta’kidlashicha, bunday reytinglar hududning moliyaviy barqarorligi, investitsion jozibadorligi va iqtisodiy istiqbolini ifodalovchi muhim ko‘rsatkich hisoblanadi. Ayniqsa, xorijiy investorlar va turistlar hudud imkoniyatlarini baholashda aynan shu kabi xalqaro mezonlarga tayanadi.
Farg‘onaning xalqaro reytingdagi ijobiy o‘rni hududga investitsiyalar oqimini kengaytirish, turizm infratuzilmasini modernizatsiya qilish va xalqaro turistlar sonini oshirish uchun yangi imkoniyatlar yaratmoqda. Bu esa viloyat iqtisodiyotida xizmatlar sohasi ulushining ortishiga, yangi ish o‘rinlari yaratilishiga va aholi daromadlarining ko‘payishiga xizmat qiladi.
Bugungi Farg‘ona nafaqat sanoat va tadbirkorlik markazi, balki boy tarixiy-madaniy merosga ega turistik hudud sifatida ham rivojlanmoqda. Rishton kulolchilik maktabi, Marg‘ilon atlas va ipakchilik an’analari, vodiyning betakror tabiati hamda milliy qadriyatlarga boy muhit turistik jozibadorlikni yanada oshirmoqda.
So‘nggi yillarda jahon turizm bozorida yangi yo‘nalishlarga talab ortib borayotgani Farg‘ona uchun qo‘shimcha imkoniyatlar ochmoqda. Xususan, MICE-turizm – xalqaro forumlar, konferensiyalar va biznes uchrashuvlari turizmi hudud iqtisodiyoti uchun istiqbolli yo‘nalish sifatida namoyon bo‘lmoqda. Iqtisodiy barqarorlik va qulay biznes muhiti xalqaro tadbirlarni tashkil etish uchun mustahkam zamin yaratmoqda.
Bu esa mehmonxona biznesi, transport-logistika, servis xizmatlari va axborot texnologiyalari sohalari rivojiga kuchli turtki bermoqda. Shu bilan birga, agroturizm ham viloyatning eng istiqbolli tarmoqlaridan biriga aylanmoqda. Serhosil yerlar, bog‘dorchilik madaniyati, milliy qishloq hayoti va ekologik dam olish maskanlari xorijiy sayyohlarda katta qiziqish uyg‘otmoqda.
Hunarmandchilik turizmi esa Farg‘onaning o‘ziga xos brendi sifatida shakllanib bormoqda. Rishton kulollarining noyob sopol buyumlari, Marg‘ilon ipakchilarining qadimiy atlas to‘qish an’analari nafaqat turistlarni jalb etmoqda, balki “Made in Uzbekistan” brendining xalqaro maydondagi nufuzini ham mustahkamlamoqda.
Ayni paytda sohada hal etilishi lozim bo‘lgan vazifalar ham mavjud. Xalqaro standartlarga mos mehmonxona va servis ob’ektlari sonini ko‘paytirish, raqamli turizm platformalarini rivojlantirish, xorijiy tillarda xizmat ko‘rsatish sifatini oshirish hamda hududiy turizm marketingini kuchaytirish ustuvor vazifalardan sanaladi.
Mutaxassislar fikricha, “smart tourism” va “sustainable tourism” konsepsiyalarini joriy etish Farg‘ona turizmini sifat jihatdan yangi bosqichga olib chiqadi. Raqamli texnologiyalar, ekologik boshqaruv va “yashil iqtisodiyot” tamoyillariga asoslangan turizm modeli hududning uzoq muddatli raqobatbardoshligini ta’minlashda muhim ahamiyat kasb etadi.
Eng muhimi, turizm rivoji aholi farovonligiga xizmat qiladi. Yangi ish o‘rinlari yaratiladi, xizmatlar eksporti kengayadi, yoshlar va xotin-qizlar bandligi ortadi, mahalliy tadbirkorlik rivojlanadi.
Farg‘ona viloyatining iqtisodiy barqarorligi bugun turizm taraqqiyotining muhim drayveriga aylanmoqda. Xalqaro reytinglarning yaxshilanishi, investitsion muhitning mustahkamlanishi va zamonaviy turizm yo‘nalishlarining rivojlanishi kelgusida Farg‘onani nafaqat O‘zbekistonning, balki Markaziy Osiyoning eng jozibador turistik va investitsion markazlaridan biriga aylantirishi shubhasiz.
Asiljon Yulchiyev,
Farg‘ona davlat universiteti,
Iqtisodiyot fakulteti katta o‘qituvchisi, i.f.f.d.
O‘zA
