Ҳаж зиёратидан қайтган юртдошларимиз иззат-икром билан кутиб олинди
Ислом дини арконларидан бири бўлган ҳаж амалларини адо этиш учун муборак сафарга жўнаб кетган ҳамюртларимиз шу кунларда Ватанимизга қайтмоқда
Мамлакатимизда фуқароларнинг эмин-эркин ибодат қилишлари, мусулмонларнинг ўз зиммаларидаги диний арконларни бекаму кўст адо этишлари учун зарур барча шароитлар яратилган. Айниқса, кейинги йилларда минглаб юртдошларимиз ҳаж ва умра амалларини адо этиб қайтаётганликлари ҳар биримизнинг қалбимизга шукроналик туйғусини солади.
Юртимизнинг барча жойларида бўлгани каби Андижон вилоятининг туман ва шаҳарларида ҳам ҳаж амалини адо этиб қайтган ҳамюртларимиз иззат-икром билан кутиб олинмоқда.
Жумладан, ҳаж зиёратидан қайтган бир гуруҳ пахтаободликлар тумандаги Абу Бакр Сиддиқ жоме масжидида Пахтаобод тумани ҳокими Давронбек Саттаров бошчилигидаги туман фаоллари, кенг жамоатчилик вакиллари, ҳожиларнинг оила аъзолари ва яқинлари томонидан кўтаринки кайфиятда кутиб олинди.
Кутиб олишга бағишланган тантанали тадбирда юз-кўзларида шукроналик ва хурсандчилик акс этиб турган ҳожиларни туман раҳбари самимий муборакбод этди. Ўз навбатида, ҳожилар ҳам юртимиз тинчлиги, халқимиз фаровонлиги ва эл-юрт равнақи учун эзгу тилаклар билдириб, дуолар қилди.
Фахриддин Убайдуллаев,
ЎзА мухбири
