Ҳарбий-спорт ўйинларининг республика босқичи ўтказилди
Ёшларни ҳарбий-ватанпарварлик руҳида тарбиялаш, уларнинг жисмоний ва маънавий салоҳиятини юксалтириш ҳамда Қуролли Кучлар сафида хизмат қилишга қизиқишини ошириш мақсадида “Шунқорлар” ҳарбий-спорт ўйинларининг республика босқичи ўтказилди.
“Ёшлар ойлиги” доирасида Ўзбекистон Республикаси мудофаасига кўмаклашувчи “Ватанпарвар” ташкилоти Марказий кенгаши раиси кубоги учун ташкил этилган мусобақанинг финал босқичи Тошкент вилоятидаги “Чирчиқ” дала ўқув майдонида бўлиб ўтди.
Унда Қорақалпоғистон Республикаси, Тошкент шаҳри ва барча вилоятлардан 17–22 ёшдаги 140 нафар йигит-қиздан иборат 14 та жамоа иштирок этди. Иштирокчилар ҳарбий-ватанпарварлик, ҳарбий-амалий кўпкураш ҳамда спорт блоклари бўйича синовлардан ўтказилди.
Ҳарбий-ватанпарварлик блокида ёшларнинг Ўзбекистон тарихи бўйича билимлари синовдан ўтказилди. Шунингдек, “Саф қўшиғи” ва “Биз – бир жамоамиз!” кўрик-танловлари ташкил этилди.
Ҳарбий-амалий кўпкураш йўналишида пневматик қуролдан ўқ отиш, ўқув гранатасини узоқликка улоқтириш ҳамда ҳарбийлаштирилган эстафета бўйича беллашувлар ўтказилди. Ёшлар “АК-74” автоматини қисмларга ажратиш ва йиғиш, газ ниқобини кийган ҳолда масофага югуриш каби амалий шартларни ҳам бажарди. Бундан ташқари, спорт блокида дуатлон, 100 метрга югуриш ва турникда тортилиш бўйича мусобақалар ташкил этилди.
Муросасиз ва қизғин кечган баҳслар якунига кўра, Тошкент вилояти жамоаси биринчи ўринни эгаллаб, “Ватанпарвар” ташкилоти Марказий кенгаши раиси кубогини қўлга киритди. Навоий вилояти жамоаси иккинчи, Андижон вилояти вакиллари эса учинчи ўринга сазовор бўлди.
Ғолиб ва совриндорлар “Ватанпарвар” ташкилоти, Ёшлар ишлари агентлиги ҳамда Ёшлар иттифоқи томонидан диплом ва қимматбаҳо совғалар билан тақдирланди.
Қайд этилишича, уч кун давом этган мусобақа якунлари бўйича 7 нафар йигит ва қиз 3-спорт разрядини қўлга киритди.
Тадбир доирасида ташкил этилган “Раҳбар ва ёшлар” учрашуви ҳам катта қизиқиш уйғотди. Унда ёшлар “Ватанпарвар” ташкилоти Марказий кенгаши раиси Ҳусан Ботиров билан очиқ мулоқот қилиб, ташкилот тизимида яратилган имкониятлар, касб-ҳунар ўрганиш ва техник-амалий спорт турлари билан шуғулланиш шароитлари ҳақида маълумот олди.
М.Ҳожиакбарова, ЎзА
