Ҳамкоримиз – “Анадолу” 106 ёшда
Бугунги кунда глобал медиа майдонида ишончли ахборотга эҳтиёж ҳар қачонгидан кучли. Шундай мураккаб бир даврда Туркиянинг етакчи ахборот агентлиги “Anadolu Ajansı” нафақат хабар тарқатувчи, балки ҳақиқатни ҳимоя қилувчи, миллий ва халқаро аудитория учун ишончли манба сифатида ўз ўрнини тобора мустаҳкамламоқда.
Шу кунларда ЎзАнинг яқин ҳамкорларидан бири ҳисобланган ушбу улкан жамоа 106 йиллигини кенг нишонламоқда. Бугун 8 апрель – ушбу ахборот агентлиги фаолияти расмий тарзда эълон қилинган кун.
“Anadolu Ajansı” 1920 йил 6 апрель куни Туркия Жумҳурияти асосчиси Mустафо Камол Отатурк ташаббуси билан Мустақиллик қўлга киритилишининг ҳал қилувчи паллаларида ташкил этилган. 12 апрелдан бошлаб Анқара марказида жойлашган бинодаги мўъжаз хонадан халққа хабарлар тарқатила бошланди.
Ҳа, “Ўзгараётган дунё хабарчиси” шиори остида фаолият юритаётган “Анадолу” агентлиги бугун шунчаки хабар тарқатмайди, балки миллатнинг овози, тарихнинг тирик гувоҳига айланган.
Ташкил этилганидан то бугунги кунгача Агентлик давлат ахборот сиёсатида марказий ўрин эгаллаб, босқичма-босқич такомиллашди. Телеграфдан радио ва телевидениега, анъанавий матндан мультимедиа форматигача бўлган улкан ва мухим йўлни босиб ўтди.
Асримиз бошидан “Анадолу” халқаро майдонда фаоллашди. Чет элларда бўлимлар очилиб, турли тилларда маҳсулот яратиш йўлга қўйилди. Ҳозирги кунда 49 халқаро ахборот агентлиги билан ҳамкорлик ўрнатилган, 13 тилда 137 мамлакатга хабар ва контент тарқатмоқда.
Жумладан, давлатимизнинг етакчи расмий ахборот агентлиги ҳисобланган Ўзбекистон Миллий ахборот агентлиги – ЎзА билан “Анадолу” ўртасида ҳамкорлик тўғрисидаги Битим 2022 йил 29 март куни Тошкентда имзоланган.
Ҳужжат Туркия Президенти Режеп Таййип Эрдоғаннинг Ўзбекистонга амалга оширган расмий ташрифи доирасида, олий даражадаги музокаралар чоғида қабул қилинди. Бу воқеа икки давлат ўртасидаги медиа ҳамкорликни янги босқичга олиб чиқди.
Бугунги кунда халқаро майдондаги ўрнини тобора мустаҳкамлаётган “Anadolu Ajansı” жамиятдаги муҳим муаммоларни ҳал этиш борасида ҳам жуда фаол.
Хусусан агентлик қошидаги “Yeşil Hat” иқлим ва экология масаласида жамоатчилик фикрини ўрганса, “Teyit Hattı” нохолис ахборотга жавоб бериш ва маълумот текширувида фаол. “Ayrımcılık Hattı” эса ирқчилик, гендер тенгсизлик ва нафратга қарши курашмоқда.
Бундай ташаббуслар Агентлик жамият ҳаётида фаол иштирокчига айланганини кўрсатади.
Ҳозирги кунда жамоа раҳбарияти рақамли трансформация, мультимедиа контенти ва халқаро ҳамкорлик йўналишларини жадал ривожлантиришга алоҳида эътибор қаратмоқда.
Нодира Кайимова, ЎзА
Туркия
