Марказий Осиё атроф-муҳит ва иқлим ўзгаришини ўрганиш университети (Green University)да Экология, атроф-муҳитни муҳофаза қилиш ва иқлим ўзгариши вазирлиги ҳузуридаги Давлат экологик экспертизаси маркази томонидан “Давлат экологик экспертизаси фаолиятидаги ислоҳотлар: муаммо ва ечимлар” мавзусида ўқув-семинар ташкил этилди.

Семинар давомида давлат экологик экспертизасининг ижобий хулосаси бўлмай туриб лойиҳаларнинг банк ва бошқа кредит ташкилотлари томонидан молиялаштирилиши ҳолатлари, атроф-муҳитга таъсирни баҳолаш материаллирини экологик экспертизадан ўтказиш учун аризаларни қабул қилиш ва амалга ошириш жараёнлари тўғрисида сўз борди.

Экологик экспертиза режалаштирилаётган ёки амалга оширилаётган хўжалик ва бошқа хил фаолиятнинг экологик талабларга мувофиқлигини белгилаш ҳамда экологик экспертиза объектини рўёбга чиқариш мумкинлигини аниқлаш демакдир.

Қайд этилишича, “Экологик экспертиза, атроф-муҳитга таъсирни баҳолаш ва стратегик экологик баҳолаш тўғрисида”ги қонуннинг  қабул қилиниши натижасида хорижий инвестор ва тадбиркорлар учун ишончли, шаффоф экологик баҳолаш тизими таъминланади ҳамда ўзига жалб этувчан инвестиция муҳити яратилади. 

Давлат экологик экспертизаси объектлари, стратегик режалаштириш ҳужжатлари лойиҳаларини тайёрлаш ва қабул қилишда давлат ва жамоатчиликнинг экологик, ижтимоий ва иқтисодий манфаатлари кўриб чиқилиши таъминланади.

Қонунда иссиқхона газлари чиқарилишини камайтириш натижасида ҳосил бўладиган углерод бирликлари муомаласини амалга оширишнинг тартибини белгилаш ҳамда иссиқхона газлари чиқарилишининг тизимли назоратини таъминлашга эътибор қаратилган.

Мутасаддиларнинг таъкидлашича, ҳавони ифлослантирувчи манбаларнинг кўпчилигини алоҳида идоралар назорат қила олмайди, бу эса атроф-муҳитга салбий таъсирни камайтириш бўйича мувофиқлаштирилган чора-тадбирларни ишлаб чиқиш зарурлигини кўрсатади.  

<iframe width="789" height="444" src="https://www.youtube.com/embed/MAyRQrSWRz8" title="“Green University” hududida Davlat ekologik ekspertizasi markazining “ekologik bogʻ”i tashkil etildi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Семинарда ҳавони ифлослантирувчи асосий омиллар санаб ўтилди ва вазиятни яхшилаш бўйича қатор чора-тадбирлар ўртага ташланди.

Тадбир сўнгида Марказий Осиё атроф-муҳит ва иқлим ўзгаришини ўрганиш университети (Green University) ҳудудида “Яшил макон” умуммиллий лойиҳаси доирасида Давлат экологик экспертизаси марказининг “экологик боғ”и ташкил этилди. Унда тадбир иштирокчилари томонидан 500 туп манзарали дарахт кўчатлари экилди.

Муҳайё Тошқораева, ЎзА