Грециянинг жанубий Гавдос оролидан 30 мил узоқликда сузиб кетаётган иккита балиқ овлаш қайиғидан 600 дан ортиқ муҳожир қутқариб олинди, деб хабар бермоқда “Associated Press” нашри.

Операцияда Греция қирғоқ қўриқлаш хизмати ва ҳудуддаги тўртта тижорат кемаси иштирок этди. Қутқарув операцияси Қидирув ва қутқарув ишларини биргаликда мувофиқлаштириш маркази (EKSED) томонидан қўллаб-қувватланди.

Йўловчилар қирғоқ қўриқлаш патрул қайиғи ва “FRONTEX” агентлиги кемаси томонидан қутқарилган.

Хабарда таъкидланишича, қутқарилган фуқаролар Палеохора портига етказилиб, уларга зарур ёрдам кўрсатилган. Ҳозирда уларни рўйхатга олиш ва шахсини аниқлаш жараёнлари давом этмоқда.

Соҳил қўриқчисининг таъкидлашича, кеча кичикроқ қайиқдагилар расмийларга Ливиянинг Тобрук шаҳридан жўнаб кетганликларини ва контрабандачиларга Грецияга ўтказиб қўйишлари учун 4 минг евро тўлаганликларини айтишган. Бири 16, иккинчиси 19 ёшли икки суданлик ўсмир муҳожирлар контрабандасида гумон қилиниб, ҳибсга олинган.

Греция йиллар давомида Яқин Шарқ, Африка ва Осиёдаги уруш ва қашшоқликдан қочган одамларга Европа Иттифоқига кириш учун ноқонуний йўллардан бири бўлиб келган. БМТнинг қочқинлар бўйича агентлиги маълумотларига кўра, ўтган йили қўшни Туркиядан ва Ливия қирғоқларидан жанубга келганлар сони кескин ошди.

2024 йилда юнонлар давлатига 60 мингдан ортиқ одам келган, уларнинг аксарияти денгиз орқали кириб келган. Жорий йилнинг 15 июнь ҳолатига кўра, жами 16 минг 290 та келганлар қайд этилган бўлиб, уларнинг 14 минг 600 дан ортиғи денгиз орқали келишган.

Ҳукумат муҳожир қайиқларининг яқин атрофдаги Греция оролларига етиб боришига йўл қўймаслик учун Туркия билан шарқий денгиз чегарасини яқиндан қўриқлаётгани сабабли, контрабандачилар каттароқ қайиқлардан фойдаланиб, шимолий Африка қирғоқларидан Грециянинг жанубий учигача бўлган узоқроқ ва хавфлироқ Ўрта ер денгизини кесиб ўтишни афзал кўрмоқда.

Ўткир Мирзо, ЎзА