Бугун, 15 сентябрь куни Самарқандда қизғин курашлар остида ўтаётган “Grand Swiss-2025” турнирининг ғолиб ва совриндорлари, 2026 йилги жаҳон чемпионати номзодлар мусобақасида иштирок этадиган шахматчилар номи аниқланади.

Мукофот жамғармаси 855 минг АҚШ долларидан иборат нуфузли мусобақанинг кеча поёнига етган 10-тур ўйинлари сарҳисобига кўра, 5 нафар номдор гроссмейстер 7 очко жамғарган ҳолда совринли ўринларга даъвогарлигини тасдиқлади.

10-турда германиялик Венсент Кеймер ҳамюрти Маттиасу Блюбаум билан, франциялик Алириза Фирузжа нидерландиялик Аниш Гири билан муроса йўлини танлаши ҳамда америкалик Ханс Моке Ниеман турнирнинг биринчи рақамли шахматчиси Рамешбабу Праггнанандхани мағлуб этиб, совринли ўринларга даъвогарлар сафидан мосуво этиши ортидан 7 очко билан ғолибликка номзод эканликларини амалда исботлади.

Кейинги ўринлардан жой олган 9 нафар иштирокчи 6,5 очко билан даъвогарларни тақиб этаётган бўлса, улар орасида ҳамюртимиз Нодирбек Абдусатторов ҳам борлиги эътиборли.

Кеча ўтган 10-тур баҳсида Абдусатторов қора доналарда ҳиндистонлик Ниҳал Саринга қарши  ўтган мураккаб ўйининг 53-юриш ҳолатида дурангга эришди.

Хўш, 11-тур учрашувлари остонасида 6,5 очко билан қўшимча кўрсаткичлар эвазига кучли ўнликда ҳаракатланаётган ҳамюртимиз Абдусатторовда совринли ўринлардан жой олиш имконияти мавжудми?

Бугун, 15 сентябрь кунги сўнгги турда ким-ким билан қарши келаётганлиги ҳамда ортда қолган 10 та турдаги натижалар таҳлилига эътибор қаратсак, Н. Абдусатторовнинг турнир ғолибига айланиш имконияти нолга тенг. Аммо совринли ўринлардан бирини эгаллаш учун жуда ҳам кичик имконияти сақланиб турибди.

Бунинг учун 11-турда 7-очкога эга шахматчилардан Алириза Фирузжа Маттиасу Блюбаумни, Аниш Гири Ханс Моке Ниеманни мағлуб этиши, Венсент Кеймер 6,5 очколи ҳиндистонлик Аржун Эригайси билан муроса йўлини танлаши ва албатта Нодирбек америкалик 22 ёшли Эвондер Лянни мағлуб этиши, шу билан бирга ҳамюртимиз сингари 6,5 очкога эга қолган иштирокчилар мазкур турда даранг ҳолатида ўйини якунлаши керак бўлади.

Бундай вазиятда, “Grand Swiss-2025”нинг охирги кунги қарама-қаршиликлари биз истаганимиздек интиҳо топиши мураккаб масала. Лекин шахматда ҳар иш амалга ошиши мумкинлигидан келиб чиқилса, натижалар биз кутганимиздек якунланиши ҳам эҳтимолдан йироқ эмасдек, назаримизда.

Аёллар мусобақасида маҳоратли шахматчи қизимиз Афруза Ҳамдамованинг 7 ва 9-турларда украиналик опа-сингил Анна ва Мария Музичукларга имкониятни бой бериши, 10-турда қозоғистонлик Меруерт Камалиденова билан тенг келиши уни совринли ўринларга даъвогарлар қаторидан чиқиб кетишига олиб келди.

Аёллар ўртасидаги баҳслардан ҳиндистонлик Ваишали Рамешбабу ва ФИДЕ байроғи остида турнирда қатнашаётган Катерина Лагно 7 очко билан турнирда етакчилик қилмоқда. Уларни тақиб этаётган 3 нафар шахматчи қизда 7, 2 нафарида 6,5 очко мавжуд. Совринли ўринлар учун кураш айнан улар ўртасида кечади.

Бугун Катерина оқ доналарда 7 очкога эга хитойлик Тан Чонгю билан, Ваишали қора доналарда 6,5 очко билан 6-ўринда бораётган озарбайжонлик Ульвия Фаталиева билан куч синашади. 7 очко билан 3-ўринда жойлашган қозоғистонлик Бибисора Асоубаева сўнггми турда  Анна Музичук қаршилигини енгишга ҳаракат қилади.

Эслатиб ўтамиз, “Grand Swiss-2025” турнирининг эркаклар гуруҳида 1-ўринни эгаллаган шахматчи 90 минг АҚШ доллари билан тақдирланса, аёллар мусобақасида ғолиб чиққан иштирокчи 40 минг АҚШ долларига эга чиқади. Шунингдек, эркаклар гуруҳида 50-поғонагача, аёллар гуруҳида 23-ўрингача қаторлардан жой олганлар мукофот жамғармаси ҳолатида пул мукофотларига эга чиқади.

Тўлқин Рўзиев, ЎзА