Германия электр тармоғига ҳужум: жиноятчи хат қолдирган
DW ахборот агентлиги хабар беришича, Вайсвайлер электр станцияси яқинида полиция Германия энергетика инфратузилмаси таркибидаги бир неча ишга тушириш қурилмаси ва энергия объектига уюштирилган ҳужум бўйинга олинган хат топди. Гумонланувчи қидирилмоқда.
Душанба куни кечқурун Ахен яқинида бир неча мослама топилган. Полиция яқин атрофдан эгаси энергия мажмуасига қилинган ҳужум учун жавобгарликни зиммасига олган мактуб топган. Бу ҳақда Кёльн маҳкамаси бугун эрталаб хабар берди.
Ҳуқуқ-тартибот идоралари маълумотига кўра, кеча соат 21:00 атрофида электр станцияси ҳудудида чақнаш кузатилган ва гумбурлаган овоз эшитилган. Қоронғи тушгани ва қалин ўсимликлар халақит бергани боис тунда ҳудудни кўздан кечириш тўхтатилган ва иш эрталаб давом эттирилган.
Терговчилар воқеа содир бўлган ҳудудда далил тўплаб, гумонланаётган жиноятчини қидиряпти. Мажмуа яқинидаги юқори кучланишли электр узатиш тизимида амалиёт ўтказиш учун тезкор бўлинма ходимлари қўшимча равишда жалб қилинган. Бошқа ишга тушириш қурилмалари аниқланган тақдирда портлатиш техникаси мутахассислари воқеа жойида навбатчилик қиляпти. Шунингдек, тепловизорли дрон ҳам ишга туширилган. Тахмин қилинаётган ҳужум натижасида жароҳатланганлар аниқланмаган.
Учинчи эътироф хати
Аввалроқ полиция Бранденбург ва Шимолий Рейн-Вестфалиядаги электр митти станцияларига ҳужум уюштирилгани даъво қилинган икки қўлёзма ҳақида маълумот берган эди. Номани ёзган киши бу қадамини энергия ишлаб чиқаришда қазиб олинадиган ёнилғидан фойдаланишга қарши кураш билан изоҳлаб, ёлғиз ҳаракат қилганини таъкидлаган. Полиция тактик сабабга кўра, янги мактуб тафсилотини ошкор этмаяпти.
Сентябрь ойи бошидан бери Германияда энергетика инфратузилмасига бир неча бор зарба берилган. Яъни, ГФРдаги энг йирик иссиқлик электр станцияларидан бирига хизмат кўрсатувчи Бранденбург митти станцияси ва Шимолий Рейн-Вестфалиядаги Бергхайм подстанцияси ҳужумга учраган. Дормаген ва Ахен яқинидаги кичикроқ мажмуалар эса навбатдаги нишон нуқталари эканини исботлайдиган буюмлар топилган.
5 сентябрь куни Дрезден бош прокуратураси Саксониядаги икки электр подстанцияси яқинида, юқори кучланишли тизим ўтган ҳудудда 12 та портловчи мослама топилгани хусусида ахборот берган.
Гумондор қидирувда
Хатлар муаллифи гевельсберглик 48 ёшли Даниэль В. экани аниқланди. Унинг хонадони тинтув қилинганда портловчи моддалар – калий нитрат ва калий перхлорат топилган. Гумондор яширинган, кейинроқ полиция унинг ўрмондаги авто тураргоҳдаги машинасини таниган. Шундан бери Даниэль бутун Европа бўйлаб қидирилмоқда. Бранденбург полицияси жиноятчи велосипедда ҳаракатланаётганини тахмин қиляпти.
Ҳукумат ҳодисага "иқлим экстремизми" сабаб, деб ҳисоблайди. Ҳужумга учраган барча объектлар электр энергияси ишлаб чиқариш учун ишлатиладиган қўнғир кўмир қазиб олинадиган ҳудудларда жойлашган.
Абдуғафур Маматов,
ЎзА
