Африка қитъасининг Сейшел ороли пойтахти Виктория шаҳрида соҳил футболи бўйича ўтказилган XIII жаҳон чемпионатида миллий терма жамоамиз қатнашмаган бўлса-да, ўзбекистонлик мутахассис иштирок этгани сабабли бир неча бор Ватанимиз номи жаранглади.

Ўзбекистонлик ФИФА рефериси Наим Қосимов Ҳинд океани қирғоқларидаги 155 та орол жамланмасидан иборат хушҳаво ва хушманзара масканда ўтган жаҳон биринчилиги баҳсларини бошқариб борди.   

Чемпионатда16 та мамлакат миллий терма жамоалари ғолиблик учун кураш олиб борди. Бразилия терма жамоаси еттинчи бор чемпионликни тантана қилган жаҳон биринчилигининг 9 та баҳсида ФИФА рефериси Найим Қосимов фаолият юритди.   

Аниқроқ айтадиган бўлсак, Н.Қосимов ўн бир кун мобайнида ўтган гуруҳ баҳсларининг биттасида (Салвадор – Италия – 0:5) бош ҳакам, бештасида бош ҳакам ёрдамчиси сифатида иш олиб борди. Беларусь – Эрон (4:3) ўртасидаги чорак финалда, Португалия – Бразилия терма жамоалари қарама-қаршилигидаги ярим финалда ҳамда Сенегал – Португалия (2:3) терма жамоалари ўртасида 3-ўрин учун кечган мураккаб ўйинларни назорат қилишда иштирок этди.   

Т. Рўзиев, ЎзА