Футбол: Миллий терма жамоамизнинг гуруҳдаги рақиби Жаҳон чемпионатида иштирок эта оладими?
Жорий йилнинг 11 июнь — 19 июль кунлари АҚШ, Мексика ва Канада давлатларида футбол бўйича ўтказиладиган Жаҳон чемпионати ўйинлари тобора яқинлашгани сайин унинг ва иштирокчи миллий терма жамоалар тўғрисидаги турфа гап сўзлар ортгандан ортиб бормоқда.
Маълумки, миллий терма жамоамиз Жаҳон чемпионатининг “К” гуруҳида Португалия, Колумбия, Конго терма жамоалари билан баҳс олиб боради.
Жаҳон чемпионати бошланишига саноқли кунлар қолганда Ўзбекистон миллий терма жамоаси билан бир гуруҳдан жой олган Конго Демократик Республикаси миллий терма жамоаси жиддий муаммога рўбарў келмоқда.
Жаҳон чемпионатини Америка Қўшма Штатларида ўтказиш бўйича Оқ уй ишчи гуруҳи ижрочи директори Эндрю Гиулиани Эбола эпидемияси туфайли Конго Демократик Республикаси терма жамоаси Жаҳон чемпионатидан четлатилиши мумкинлигини айтди, деб хабар тарқатмоқда хорижий ахборот воситалари.
"Биз Конго Демократик Республикасига жамоа 11 июнь куни Хюстонга келишдан олдин 21 кун карантинда бўлиши кераклигини билдирдик. Биз буни ҳукуматга ҳам етказдик. Агар улар карантинда бўлмаса, Қўшма Штатларга киритилмаслиги мумкин", дея таъкидлаган Гиулиани.
Олдинроқ маълум қилинганидек, Эбола вируси Конго мамлакатида кенг авж олган ва 177 нафар инсон ҳаётдан кўз юмгани тасдиқланган.
АҚШ ҳукумати эса айни дамда терма жамоа футболчиларининг изоляцияда бўлишини талаб қилмоқда. Акс ҳолда футболчилар Жаҳон чемпионатида иштирок эта олишмайди.
Айтиш лозим, Конго футбол жамоаси мундиалдаги илк баҳсини 17 июнь куни Португалияга қарши ўтказади.
Ушбу жамоанинг Ўзбекистон миллий терма жамоасига қарши баҳси эса 28 июнь куни ўтказилиши белгиланган.
Т.Рўзиев, ЎзА
