Андижон шаҳридаги универсал спорт мажмуасида фиджитал спорт турининг фиджитал футбол (FIFA 24 футбол 2х2), фиджитал баскетбол (3х3 EA) ва фиджитал рақс йўналишлари бўйича республика чемпионатининг вилоят босқичи бўлиб ўтмоқда.

Маълумки, кейинги йилларда дунё миқёсида рақамлаштириш, рақамли технологиялар, IT соҳаси ривожланиб бормоқда. Фиджитал рақамли технологиялар асосида шаклланган спорт ўйинларидир.   

Фиджитал инглизча – digital  – “raqamli” +  + physical  “jismoniy” сўзлардан олинган бўлиб, ушбу ўйин икки форматдаги – виртуал, яъни рақамли ва жисмоний мусобақаларни бирлаштирган спорт тури ҳисобланади. Иккала мусобақада энг кўп балл тўплаган иштирокчи ўйин ғолиби саналади. Фиджитал спорт ўйинлари ҳам якка, ҳам жамоавий шаклда ўтказилиши мумкин.   

Фиджитал атамаси 2007 йилда Австралиянинг Experience Design ташкилоти томонидан ўйлаб топилган.    

Ўзбекистонда ҳам фиджитал спорт ўйинлари ривожланиб бормоқда. Мамлакатимиз жамоаси Россиянинг Қозон шаҳрида ўтказилган “Брикс” ўйинларида учта йўналишда иштирок этиб, муносиб натижа кўрсатди.   

Ўзбекистон фиджитал спорт федерацияси ҳамда вилоят спорт бошқармаси ҳамкорлигида ўтказилган фиджитал спорт мусобақасининг ҳар бир йўналиши бўйича кўплаб жамоалар иштирок этиб, ғолиблик учун баҳс олиб бормоқда.   

– Мамлакатимизда ушбу спорт ўйинларини ривожлантириш, келгусидаги нуфузли спорт мусобақаларига спортчиларни саралаб олиш ҳамда миллий терма жамоани шакллантириш мақсадида ўтказилаётган мазкур ўйинлар барча вилоятларда бўлиб ўтмоқда, – дейди Ўзбекистон фиджитал федерацияси бўлим бошлиғи Ҳусан Насруллаев. – Жумладан, Андижонда ўтказилаётган вилоят босқичи мусобақаларида иштирок этиш учун барча туман, шаҳар жамоалари, шунингдек, кўплаб ташкилот ва маҳаллалардан талабномалар тушганлиги бизни қувонтиради.     

Бир неча кун давом этадиган мусобақаларда барча йўналишлар бўйича ғолиб бўлган жамоалар жорий йил 21-23 ноябрь кунлари Тошкент вилояти Ангрен шаҳрида ўтказиладиган фиджитал спорт ўйинларининг республика босқичида иштирок этиш учун йўлланмани қўлга киритади.   

[gallery-20332]

Шунингдек, ғолиб ва совриндорлар федерация томонидан диплом, тегишли медал ва эсдалик совғалари билан тақдирланади. 

Республика мусобақалари якунига кўра, энг иқтидорли спортчилар саралаб олиниб, 2025 йил Бирлашган Араб Амирликларининг Дубай шаҳрида бўлиб ўтадиган “Келажак ўйинлари – 2025” ҳамда Бразилия давлатида бўлиб ўтадиган “БРИКС” давлатлари спорт ўйинларида иштирок этади.   

Ф.Убайдуллаев,

З.Умрзоқов (фото), ЎзА мухбирлари