Фарғонада футбол ривожи янги босқичга чиқмоқда
ФОТОРЕПОРТАЖ
24 йиллик танаффусдан сўнг “Нефтчи” футбол клубининг яна Ўзбекистон чемпионига айланиши Фарғона вилоятида футбол соҳасининг ривожи учун мустаҳкам замин яратди. Мазкур тарихий ғалаба мухлислар ва кенг жамоатчиликда катта руҳий кўтаринкилик уйғотди.
Айниқса, вилоят ҳокими Хайрулло Бозоров томонидан илгари сурилган “Фарғонани Ўзбекистоннинг футбол пойтахтига айлантирамиз” деган юксак мақсад футбол ихлосмандлари томонидан катта мамнуният билан қарши олинди. Бу ташаббус бугунги кунда амалий ишлар билан мустаҳкамланмоқда.
[gallery-28911]
Ҳозирги кунда вилоятнинг барча шаҳар ва туманларида ёшларни футболга кенг жалб этиш, уларнинг мунтазам шуғулланиши учун зарур шароитлар яратилмоқда. Замонавий спорт иншоотлари барпо этилиб, мавжуд майдонлар босқичма-босқич таъмирланяпти.
Жумладан, Бағдод туманидаги “Марказий” ўйингоҳи ёш футболчиларнинг севимли масканларидан бирига айланган. Бу ерда машғулотлар билан бир қаторда турли мусобақалар ҳам мунтазам ўтказиб келинади.
Бағдодлик мураббий Азизбек Маткаримовнинг таъкидлашича, мамлакатимизда футболга бўлган эътибор тобора ортиб бораётир.
— Ўзбекистон миллий терма жамоасининг жаҳон чемпионатига йўлланма олгани, шунингдек, ёш спортчиларимиз эришаётган ютуқлар футболга қизиқишни янада оширди. Айниқса, “Нефтчи” жамоасининг муваффақиятлари ёшлар учун катта илҳом манбаига айланмоқда. Натижада спорт тўгаракларига келувчилар сони кескин ошди. Бугун фарзандларини етаклаб келаётган ота-оналар ҳам кўпаймоқда, - дейди мураббий А. Маткаримов. — Яратилаётган шароитлар учун юртбошимизга миннатдорлик билдирамиз.
Айни пайтда Бағдод туманидаги “Марказий” ўйингоҳи нафақат спорт иншооти, балки соғлом турмуш тарзини тарғиб этувчи, ёшларни тарбия ва камолотга етакловчи муҳим масканга айланиб бормоқда.
Ҳотам МАМАДАЛИЕВ(сурат),ЎзА
