Европа клублар кубоги: Абдусатторов жамоаси бугун чемпионлик учун курашади
Бугун, 23 август куни Черногориянинг Будва шаҳрида шахмат бўйича клублар ўртасида ўтаётган Европа кубогининг сўнгги 7-тур ўйинларида ғолиб ва совриндорлар аниқланади.
Унда Нодирбек Абдусатторов етакчилигидаги “SuperChess Romania” жамоаси қора доналарда Аниш Гери сардорлигидаги “Bayegan Pendik Chess Sports Club” вакиллари билан, Ёқуббоевнинг “Novy Bor Chess Club” жамоаси Пранав сардорлигидаги “Elektroprivreda” клуби билан куч синашади.
Айнан ушбу тўртта жамоа ўртасидаги ўйинда қайд этиладиган натижалар 41-бор ташкил этилаётган кўҳна қитъа кубоги ғолибини аниқлаб бериши билан аҳамиятлидир.
Кеча ўтказилган 6-тур мусобақасида “SuperChess Romania” жамоаси “Novy Bor Chess Club” билан рўбарў келди.
Ушбу баҳсда шахмат ишқибозлари Абдусатторов-Ёқуббоев “жанги”га гувоҳ бўлишди.
Мамлакатимизнинг икки номдор гроссмейстерлари курашида Абдусатторовнинг қўли баланд келган бўлса, ҳар икки жамоа ўртасидаги якуний ўйинлар ҳолатида томонлар 3:3 ҳисобидаги дурангга имзо чекди.
Ушбу натижалардан кейин ортда қолган 6-тур ўйинларидан кейин “SuperChess Romania” жамоаси 11 очко билан қўшимча кўрсаткичлар эвазига етакчилик қилмоқда. Аниш Гири сардорлигидаги “Bayegan Pendik Chess Sports Club” ва Ёқуббоев етакчилигидаги “Novy Bor Chess Club” жамоалари ҳам 11 очко билан кейинги поғоналарда ҳаракатланмоқда.
Т. Рўзиев, ЎзА
