Европа Хитой автомобилсозлигига қарши “катта тўртлик”ни шакллантирмоқчи
Европа Комиссияси Европада Хитой автомобилсозлик саноатининг ўсишини чеклаш учун Буюк Британия, Япония ва Жанубий Корея билан иқтисодий иттифоқ тузмоқчи, деб ёзди “Handelsblatt” нашри.
Ҳамкорлар ўз бозорларини бир-бирига очиқ сақлашни ва муҳим хом ашё етказиб бериш учун биргаликда ишлашни режалаштирмоқда.
Нашрга кўра, Буюк Британия, Япония ва Жанубий Кореядан келган автомобиллар ЕИда Европа автомобиллари каби имтиёзларга эга бўлишлари мумкин. Бунга электр транспорт воситаларини сотиб олиш учун субсидиялар ва компания автомобиллари учун солиқ имтиёзлари киради. Шу билан бирга, Брюссел импорт кескин ўсган тақдирда ҳимоя тарифларини жорий этиш имкониятини ҳам кўриб чиқмоқда.
Таъкидланишича, жорий йилнинг май ойидан бери Хитой брендлари биринчи марта Европада барча йирик япон автомобиль ишлаб чиқарувчиларининг умумий сонидан кўпроқ автомобиль сотган.
С.Раҳимов, ЎзА
