Эрон АҚШга Ҳурмуз бўғозини очиш ва урушни якунлаш бўйича тинчлик режасини таклиф қилди
Эрон Яқин Шарқдаги кескинликни юмшатиш ва уруш ҳолатига чек қўйиш мақсадида АҚШ маъмуриятига янги келишув режасини тақдим этди. Эрон ташқи ишлар вазири Аббос Арағчий томонидан Исломободдаги музокара доирасида покистонлик воситачилар орқали етказилган бу таклифда Ҳурмуз бўғозини очиш ва портлардаги қамални бекор қилиш шарти кўрсатилган. Вашингтоннинг жавоби эса ҳали номаълум.
Бу ҳақда “Axios” портали хабар берган. Режага кўра, томонлар ўт очишни узоқ муддатга тўхтатиши ёки урушни бутунлай тугатиш бўйича якуний битимга келиши зарур. Иқтисодий ва ҳарбий чеклов олиб ташлангач, Теҳрон ядро дастури бўйича музокара бошлашга тайёрлигини билдирган.
Оқ уй ушбу таклифни олган бўлса-да, Вашингтоннинг шартга рози бўлиш-бўлмаслиги маълум эмас. Таҳлилчилар фикрича, қамал бекор қилиниши АҚШнинг Эрон ядро дастурига таъсир ўтказиш воситасини чеклаб қўйиши мумкин. Президент Дональд Трамп 27 апрель куни ўз жамоаси билан мавжуд вазият ва кейинги эҳтимолий қадамларни атрофлича муҳокама қилиши кутиляпти. Аввалроқ Эроннинг қатъий позицияси туфайли ўз вакилларининг Покистонга сафарини бекор қилган Америка етакчиси энди Теҳроннинг янги ташаббусига нисбатан муносабат билдириши лозим. Эслатиб ўтамиз, минтақада можаро бошлангандан буён Ҳурмуз бўғози ёпиқ, Эрон портлари АҚШнинг қатъий денгиз қамали остида турибди.
Ф.Яхшибоева, ЎзА
