Енгил атлетика: Шарифа Давронова жаҳон чемпионатида кучли ўнликдан жой олди
Польшанинг Куявия-Поморзе шаҳрида енгил атлетика бўйича ёпиқ иншоотларда ўтказилаётган навбатдаги жаҳон чемпионатида дунёнинг 118 та давлатидан 674 нафар спортчи иштирок этмоқда.
Улар орасида ўзбекистонлик енгил атлетикачилар ҳам ўз омадини синовдан ўтказаётгани аҳамиятлидир.
Кеча жаҳон чемпионатининг иккинчи кунида Ўзбекистон терма жамоаси аъзоси Шарифа Давронова уч ҳатлаб сакраш дастурида баҳс олиб борди.
Самарқанд енгил атлетика мактаби тарбияланувчиси бўлган 19 ёшли Давронова муросасиз баҳсларда 13.81 метр натижа қайд этиб, ўтган йилги жаҳон чемпионатидаги натижасини 37 сантиметрга яхшилашга эришди.
Бу кўрсаткич орқали Шарифа жаҳон чемпионати финалида қатнашган 17 нафар спортчи орасида 10-ўринни эгаллашига олиб келди. Ушбу йўналишда Куба терма жамоаси аъзоси Леанис Перес Эрнандес 14,95 метр натижа билан ғолибликка эришди.
Медаллар жамғаришда 3 та олтин медаль билан Италия терма жамоаси етакчилик қилаётган бўлса, кейинги ўринда бораётган АҚШ ҳисобида 2 та олтин, 5 та кумуш ва 3 та бронза медали бор. Украина енгил атлетикачилари 2 та олтин, 1 та кумуш медаль билан кучли учликка якун ясаган.
Эслатиб ўтамиз, жаҳон чемпионатида 27 та медаллар жамғармаси учун баҳслар ўтказилмоқда.
Т.Рўзиев, ЎзА
