“BMB HOLDING” компанияси таркибига кирувчи корхоналарнинг асосий қисми, шу жумладан, экспортёр корхоналар ҳам ўз фаолиятини асосан Жиззах вилояти ҳудудида амалга ошириб келмоқда.

Компания “Камбағалликдан фаровонлик сари” дастурининг ижроси доирасида воҳа аҳлининг бандлигини таъминлашда муҳим роль ўйнамоқда.

Мамлакатимиз иқтисодиётини юксалтиришнинг муҳим омилларидан бири шубҳасиз экспортдир. Шу сабабдан “BMB HOLDING” таркибига кирувчи экспортга ихтисослашган корхоналар томонидан мунтазам равишда юртимизда етиштирилиб, қайта ишланган юқори сифатли, жаҳон стандартларига жавоб бера оладиган қишлоқ хўжалиги маҳсулотлари нафақат қўшни давлатларга, балки Осиё ва Европа мамлакатларига ҳам етказиб берилаётганини алоҳида таъкидлаб ўтиш жоиз.

Саховатли Жиззах заминида етиштирилган бир қатор турдаги қишлоқ хўжалиги маҳсулотлари жорий йилнинг ноябрь ойида “BMB-NRC Agrologistics” мажмуаси орқали хорижий давлатларга экспорт қилинди. Хусусан, хурмо, олма, лимоннинг бир нечта турлари, пиёз, ловия, ошқовоқ каби сабзавот ва полиз маҳсулотлари Россия Федерацияси, Қозоғистон, Покистон, Хитой, Туркия, Латвия ҳамда Грузия каби давлатларга жўнатилмоқда.

Эрон Ислом Республикасининг “ZBKR” ва “Middle East Fruit Science” компаниялари раҳбарлари билан келишувдан сўнг “BMB HOLDING” компаниясининг экспорт географияси яна биттага ортди. Энди форс давлатига ҳам Ўзбекистоннинг қайта ишланган ва қуритилган энг сара қишлоқ хўжалиги маҳсулотлари экспорт қилинадиган бўлди.  

Мунтазам равишда, аниқ стратегия ва режа асосида амалга оширилаётган бу каби экспорт амалиётларидан мақсад битта  юртимиз иқтисодиётига, экспорт салоҳиятининг ошишига, халқимиз фаровонлигига ва реестр рўйхатида турувчи фуқароларимизнинг камбағалликдан фаровонликка эришишига ҳисса қўшишдир.

А.Қаюмов, Ж.Ёрбеков (сурат),

ЎзА мухбирлари